"ყველა ძაღლს, რომელიც ქუჩიდან ხვდება თავშესაფარში, დახოცავენ"

საზოგადოება - 12:22, 31 Mar, 2015

1205

თბილისის მერიის ახალ ინიციატივას , რომლის მიხედვითაც შინაური ცხოველების რეგისტრაცია სავალდებულო ხდება, ცხოველთა უფლებადამცველები აპროტესტებენ. პატრონებს , რეგისტრაციასთან ერთად , ცხოველებისთვის , ყელსაბამის გარდა, მიკროჩიპის, ტატუირების ან იარლიყის გაკეთება მოუწევთ. გუშინ მერიის ამ ინიციატივის წინააღმდეგ, აქცია გაიმართა.

ბიზნესმენი და ცხოველთა თავშესაფრის მფლობელი თამაზ ელიზბარაშვილის განცხადებით, ცხოველთა დამცველების აღშფოთება და პროტესტი იმ ფაქტმა გამოიწვია, რომ ქუჩის ყველა უსახლკარო ძაღლი, აღნიშნული პროექტით ექვემდებარება სიკვდილს, მიუხედავად იმისა ის აგრესიულია, წყნარი,ჯანმრთელი თუ ავადმყოფი.

„ამ პროექტის მიხედვით, ძაღლი თუ ცხოვრობს ქუჩაში, მიუხედავად იმისა, ჰყავს თუ არა მეურვე, უკეთებს აცრას, უვლის, აჭმევს საჭმელს, რადგან ეს ძაღლი ცხოვრობს ქუჩაში, უნდა იქნას გადაყვანილი მერიის მუნიციპალიტეტის თავშესაფარში.ამას არეგულირებს მერვე მუხლი. მეცხრე მუხლში კი წერია, რომ ყველა ძაღლი, რომელიც მოხვდება მერიის თავშესაფარში. თუ ვერ შეეგუა იქ არსებულ პირობებს და მოიწყინა, ჩავარდა სტრესულ ვითარებაში ექვემდებარება სავალდებულო სიკვდილს ევთანაზიის გზით. ძაღლებს სტრესი ემართებათ ნებისმიერ შემთხვევაში , რადგან მას როცა ბუნებრივ არეალს მოსწყვეტ, გადაიყვან სხვაგან და ჩაკეტავ, იქ ყველა ვარიანტში ძაღლი მოიწყენს. მერე მიჰყავთ ძაღლი და კლავენ. აი რას ვაპროტესტებთ. თუ მოხდა სასწაული და ძაღლი არ ჩავარდა სტრესულ ვითარებაში, არის ჯანმრთელი, არ არის აგრესიული, ამ შემთხვევაში ძაღლს უკეთდება სტერილიზაცია-კასტრაცია. 10 დღის გასვლის შემდეგ თუ ეს ძაღლი არ გაჩუქდა თავშესაფრიდან, ხდება მისი სავალდებულო მოკვლა ევთანაზიის გზით.“- აცხადებს თამაზ ელიზბარაშვილი და აღნიშნავს , რომ თუ კანონპროექტი მსგავსი სახით დამტკიცდა, ადგილი ექნება კორუფციის ფაქტებს:

„მერიის თავშესაფრისა და მოსახურების სააგენტოსთვის გამოყოფილია 2 ,9 მილიონი. აქედან 169 ათასი გამოყოფილია ძაღლებზე, რაშიც შედის კვება, ევთანაზიის ხარჯი, ოპერაცია. თავშესაფარი იტევს 15 ძაღლს, როცა 150 ძაღლს მარტო ერთ დღეში იჭერს ეს სამსახური. სწორედ ისაა საქმე რომ აქაც ფული კეთდება. ძაღლი, რომელსაც გაუკეთდება სტერილიზაციის ოპერაცია და ამაში გამოყოფილია თანხა ბიუჯეტიდან, ეს თანხა 70 ლარამდეა. 10 დღის მერე ეს ნაოპერაციები ძაღლი უნდა მოკლან, ესე იგი, რა გამოდის, სახელმწიფო უკეთებს ოპერაციას და მერე კლავს. ერთი ქუჩის ძაღლი მაჩვენეთ, რომელი გაჩუქდა. ყველა ძაღლს, რომელიც ქუჩიდან ხვდება თავშესაფარში, დახოცავენ . აი სადაა კორუფცია. ამ მოკლულ ძაღლს ვინ გაუკეთებს ექსჰუმაციას, რომ დაადგინონ, ჰქონდა თუ არა სტერილიზაცია გაკეთებული? იქნებ არ გაუკეთეს და ფული ჯიბეში ჩაიდეს?“- აღნიშნავს ელიზბარაშვილი.