მთავრობა დაუბეგრავი მინიმუმის დაბრუნებას იწყებს

ბიზნესი & ეკონომიკა - 09:53, 01 Apr, 2015

26463

დაუბეგრავი მინიმუმით მოსარგებლე პირებს თანხის დასაბრუნებლად შესაბამისი დეკლარაციის შევსება 1 აპრილიდან, შემოსავლების სამსახურის ვებგვერდზე - rs.ge შეუძლიათ.

შემოსავლების სამსახურის ინფორმაციით, თუ მოქალაქის მიერ 2014 წელს მიღებული ერთობლივი შემოსავალი არ აღემატება 6 000 ლარს, მას უფლება აქვს, შესაბამისი კალენდარული წლის მიხედვით ხელფასის სახით მიღებული დასაბეგრი შემოსავლიდან გამოქვითოს დაუბეგრავი მინიმუმი - 1800 ლარი და მოითხოვოთ აღნიშნულზე გადახდილი შესაბამისი საშემოსავლო გადასახადის თანხის დაბრუნება.

კერძოდ, თუ 2014 წელს მიღებული ერთობლივი შემოსავალი 1800-დან 6000 ლარამდეა, მოქალაქეს უფლება აქვს, მხოლოდ ხელფასის სახით მიღებული შემოსავლიდან დაიბრუნოს 360 ლარი, ხოლო თუ შემოსავალი 1800 ლარამდეა, დაბრუნებას ექვემდებარება (მხოლოდ ხელფასის სახით მიღებული შემოსავლიდან) კონკრეტული თანხის 20 პროცენტი.

მოქალაქეს დეკლარაციის შევსებისას შეუძლია აღმოაჩინოს, სარგებლობს თუ არა დაუბეგრავი მინიმუმის გამოქვითვის უფლებით და შეიტყოს დასაბრუნებელი თანხის ოდენობა.

ელექტრონული დეკლარაციის წარდგენის შემდეგ, მოქალაქეს დაუბეგრავი მინიმუმის შესაბამისი თანხა მის მიერ მითითებულ ანგარიშზე რეგისტაციიდან მაქსიმუმ, 3 თვის განმავლობაში დაუბრუნდება.

ამასთან, ვისაც 2013 წლის მიხედვით ხელფასის სახით მიღებულ შემოსავალზე დაუბეგრავი მინიმუმის გამოქვითვის უფლებით არ უსარგებლია, შეუძლიათ, მიმართოს შემოსავლების სამსახურს, არაუგვიანეს 2015 წლის 30 სექტემბრისა.

მოქალაქეებს დეკლარაციის შევსების საშუალება 1 აპრილიდან 30 სექტემბრის ჩათვლით ექნებათ.

_{ნინო ზედგენიძე}