GNCC-ი ნეპოტიზმის ფაქტების შესახებ IDFI-ს ბრალდებას პასუხობს

საზოგადოება - 20:36, 27 Mar, 2015

1714

საქართველოს კომუნკაციების ეროვნულმა კომისიამ (GNCC) არასამთავრობო ორგანიზაცია IDFI-ს კვლევასთან დაკავშირებით განცხადება გაავრცელა. GNCC-ი განმარტავს, რომ შემადგენლობის განახლების შემდეგ მხოლოდ რამდენიმე ხელშეკრულება გაფორმდა. GNCC-ი იზიარებს IDFI-ს რამდენიმე რეკომენდაციას.

„კომისიის შემადგენლობის განახლების შემდეგ კომისიის აპარატში შტატგარეშე თანამშრომელთა მიღების პრაქტიკა მინიმუმამდე არის დაყვანილი, საქართველოს „შრომის კოდექსის“ და „საჯარო სამსახურის შესახებ“ საქართველოს კანონის შესაბამისად გაფორმდა მხოლოდ რამდენიმე ხელშეკრულება კონკრეტული ამოცანების შესრულების მიზნით.

კომისია იზიარებს IDFI-ს რეკომენდაციებს, კერძოდ:

• უნდა დაიხვეწოს კომუნიკაციების ეროვნული კომისიის აპარატის თანამშრომელთა დანიშვნის, დაწინაურების და გათავისუფლების მარეგულირებელი ნორმები;

• განვითარდეს ეთიკის, ინტერესთა კონფლიქტისა და შეუთავსებლობის მარეგულირებელი ნორმების იმპლემენტაციის მექანიზმი;

• დაიხვეწოს მომხმარებელთა ინტერესების საზოგადოებრივი დამცველის ინსტიტუტის თანამშრომელთა დანიშვნისა და გათავისუფლების მარეგულირებელი ნორმები.

• კომისიის აპარატის, ასევე მომხმარებელთა ინტერესების საზოგადოებრივი დამცველის სამსახურში როგორც საშტატო, ისე არასაშტატო კადრების მიღება მოხდეს გამჭვირვალე პროცესით;

• საჯაროდ გამოცხადდეს ვაკანსიები, სადაც კონკრეტულად იქნება გაწერილი სამუშაოს აღწერა;

• კონკურსში მონაწილეობის საშუალება მიეცეს ყველა დაინტერესებულ პირს, რაც ხელს შეუწყობს კონკურენციის გაზრდას და ამა თუ იმ პოზიციაზე მაღალპროფესიონალი კადრების შერჩევას.

უფრო მეტიც, პუბლიკაციაში ხსენებულ ანტიკორუფციული საბჭოს სამუშაო სხდომაზე კომისიის თავმჯდომარე ვახტანგ აბაშიძე, თავად იყო აღნიშნული რეკომენდაციების ინიციატორი.

ამ ეტაპზე მიმდინარეობს მუშაობა კომისიის აპარატის სტრუქტურული ოპტიმიზაცია-რეორგანიზაციის უზრუნველსაყოფად. მზადდება და უახლოეს მომავალაში დამტკიცდება ახალი სტრუქტურა და საშტატო ნუსხა. კომისიის აპარატის რეორგანიზაციის პროცესი წარიმართება საჯაროდ,“- ნათქვამია კომუნიაციების ეროვნული ომისიის მიერ გავრცელებულ განცხადებაში.

შეგახსენებთ, რომ IDFI-მ გაავრცელა ინფორმაცია, რომლის მიხედვით საქარათველოს კომუნიკაციების ეროვნულ კომისიაში ვაკანტურ ადგილებზე თანამშრომლების აყვანასთან დაკავშირებით ნეპოტიზმის ნიშნები იკვეთება.

ლაშა ჯაფარიძე