კომერციული ბანკები საქართველოს პრემიერმინისტრს ირაკლი ღარიბაშვილის მიმართვას პასუხობენ, რომლითაც მთავრობის მეთაურმა მათ კიდევ ერთხელ მოუწოდა მოსახლეობის გაჭირვებულ ნაწილს კურსთა შორის სხვაობის გადახდა გადაუვადონ. ეს მოწოდება ირაკლი ღარიბაშვილმა პრესკონფერენციაზე გააკეთა.

„საქართველოს ბანკში“ აცხადებენ, რომ მათ რესტრუქტურიზაცია იმ დღიდანვე დაიწყეს, რა დღიდანაც ეროვნულმა ბანკმა კომერციულ ბანკებს კონკრეტული გეგმის მომზადებისკენ მოუწოდა.

ბანკის განმარტებით, რესტრუქტურიზაცია თავადვე გულისხმობს სესხის ვადის გაგრძელებას, რომლის შედეგადაც მომხმარებლებს ყოველთვიურად გადასახადი უმცირდებათ.

„საქართველოს ბანკის“ ცნობით, კლიენტები დინამიურ რეჟიმში მიმართავენ გადავადების მოთხოვნით და ბანკიც აკმაყოფილებს მათს მოთხოვნებს. რაც შეეხება სტატისტიკას, ბანკში აცხადებენ, რომ ჯერ ძალიან მცირე დროა გასული და კონკრეტული რიცხვი დაზუსტებული არ არის.

„ბაზისბანკშიც“ აცხადებენ, რომ რესტრუქტურიზაციის პროცესი დაწყებულია, მიმართვიანობა კი საშუალოა.

„მათ ვისაც ფინანსურად უღირს, ის აკეთებს გადავადებას. ზოგიერთ შემთხვევაში ვადის გაზრდა არც კი ღირს იმდენად მცირედით იცვლება გადასახდელი თანხა. მათთვის, ვისთვისაც ეს იქნება რეალური ფინანსური შეღავათი, მათი განაცხადი კმაყოფილდება“,- აცხადებენ ბანკში.

პრემიერის განცხადების საპასუხიდ, „თიბისიშიც“ ამბობენ, რომ რესტრუქტურიზაციის პროცესი მიმდინარეობს. უკვე ორი კვირაა სესხის გადავადებას იმ მომხმარებლებს სთავაზობენ, ვინც ლარის კურსის დევალვაციის გამო დაზარალდა.

რაც შეეხება „ლიბერთი ბანკს“, ფინანსურ ორგანიზაციაში აღნიშნავენ, რომ მათი სესხების უდიდესი ნაწილი ლარშია, ამიტომ პრემიერის მიმართვა ნაკლებად ეხებათ. რაც შეეხება დოლარში გაცემულ სესხებს, ბანკში ამბობენ, რომ ეს ძირითადად ბიზნესის წარმომადგენლებზე გაცემული სესხებია, რომელთანაც მუშაობა აქტიურად მიმდინარეობს.

25 თებერვალს ეროვნული ბანკის პრეზიდენტ, გიორგი ქადაგიძესა და კომერციული ბანკების ხელმძღვანელებთან გამართულ შეხვედრაზე ეროვნულმა ბანკმა სთხოვა კომერციულ ბანკებს წარმოედგინათ გეგმა, თუ როგორ უნდა შეუმსუბუქონ ტვირთი ფიზიკურ პირებს, რომლებსაც სესხი დოლარში აქვთ გამოტანილი, შემოსავალი კი ლარში აქვთ.