გარდაბანში 35 ჰექტარი მიწა თანაინვესტირების ფონდს არა ერთ ლარად, არამედ 10 მილიონ ლარამდე საინვესტიციო ვალდებულების სანაცვლოდ გადაეცა.

ამის შესახებ ფონდის ხელმძღვანელმა გიორგი ბაჩიაშვილმა გარდაბანში ჟურნალისტებთან საუბრისას განაცხადა.

მისი თქმით, უძრავი ქონება გადაეცა თანაინვესტრების ფონდს და არა იმ კომპანიას, რომელსაც ის და უჩა მამაცაშვილი ხელმძღვანელობენ.

„სრული პასუხსიმგებლობით ვაცხადებ, რომ 2,5 მილიონ ლარად შეფასებული მიწა არა ერთ ლარად, არამედ 10 მილიონიანი საინვესტიციო ვალდებულებით გადმოგვეცა საქართველოს თანაინვესტორების ფონდს და არა მის თანმხლებ კომპანიებს, რომლის მფლობელები გახლავართ მე და უჩა მამაცაშვილი. უკვე აშენებულია 44 ათასი კვადრატული მეტრი. მშენებლობის მეორე ეტაპი აპრილში დაიწყება, რომელსაც კიდევ 85 ათასი კვადრატული მეტრი დაემატება. უკვე ჩადებულ 10 მილიონ ლარს დაემატება 20 მილიონი ლარი სექტემბრამდე. ამ ეტაპზე 108 ადამიანია დასაქმებული“, - განაცხადა ბაჩიაშვილმა.

ნაციონალური მოძრაობის“ ინფორმაციით, „ქართულმა ოცნებამ“ პროგრამა - "აწარმოე საქართველოში" და თანაინვესტირების ფონდი თავისი წევრების და ლიდერების გამდიდრებისთვის გამოიყენა. პარტიის წევრის გიორგი ვაშაძის თქმით, ქალაქ გარდაბანში მდებარე ნაკვეთი პროექტ "აწარმოე საქართველოს" ფარგლებში "საქართველოს სათბურის კორპორაციას" 1ლარად გადასცეს. "საქართველოს სათბურის კორპორაციის" 100%-იანი წილის მფლობელი შპს "ჯი სი ეფ პარტნიორებია" - ეს უკანასკნელი კი ივანიშვილის დისშვილ უჩა მამაცაშვილსა და თანაინვესტორების ფონდის გენერალურ დირექტორ გიორგი ბაჩანაშვილის ეკუთვნის.

ნინო დათაშვილი