საქართველო მდიდარია ენერგორესურსებით და გააჩნია საერთაშორისო პროექტებში ჩართვის პოტენციალი

საქართველო მდიდარია ენერგორესურსებით და გააჩნია საერთაშორისო პროექტებში ჩართვის პოტენციალი - კალაძე

ბიზნესი & ეკონომიკა - 21:20, 19 Mar, 2015

1414

საქართველოს ჰიდროსექტორში პირველ ტრანსსასაზღვრო საინვესტიციო პროექტის მშენებლობას Tata Power-ისა და Clean Energy Invest-ის მიერ დაფუძნებული საწარმო ახორციელებს

საქართველოს ენერგოსისტემაში უმსხვილესი ჰიდროენერგეტიკული პროექტის - ,,შუახევიჰესის’’ დაფინანსების საბოლოო ფაზის ხელშეკრულებას მოეწერა ხელი. როგორც ენერგეტიკის მინისტრმა ხელმოწერის ცერემონიაზე განაცხადა, "შუახევი-ჰესის პროექტი ძალზედ მნიშვნელოვანია საქართველოს სახელმწიფოსთვის, ვინაიდან ეს არის პირველი ტრანსსასაზღვრო საინვესტიციო პროექტი საქართველოს ჰიდროსექტორში, რომელიც ხორციელდება არარეგრესული დაფინანსებით, სამი საერთაშორისო საფინანსო ინსტიტუტის მიერ.

„ამავდროულად, ეს არის პირველი ჰიდროპროექტი საქართველოში, რომლიც სერთიფიცირებულია გაერო-ს კლიმატის ცვლილების ჩარჩო კონვენციის მიერ. პროექტის დასრულების შემდეგ, 200 000 ტონით შემცირებული იქნება სათბური გაზების გამოფრქვევა ანალოგიური სიმძლავრის ადრეაშენებულ ჰიდროპროექტებთან შედარებით. მინდა კიდევ ერთხელ აღვნიშნო, რომ ჩვენი ქვეყნის სწრაფვა ენერგოდამოუკიდებლობისკენ არის შეუქცევადი პროცესი და მსგავსი პროექტების განხორციელება არის ერთ-ერთი შემადგენელი კომპონენტი, ვიტყოდი ძირითადიც კი ამ მიზნის რეალიზაციისთვის", - განაცხადა კალაძემ.

როგორც ენერგეტიკის მინისტრმა აღნიშნა, საქართველოს ეკონომიკური განვითარება დამოკიდებულია ენერგეტიკის განვითარებაზე.

"ჩვენ დარგში დასაქმებული თითოეული ადამიანი, საქართველოს მთავრობა ვაცნობიერებთ ამ მნიშვნელობას და საერთო ძალისხმევით ვცდილობთ ენერგეტიკაში მიმდინარე პროცესები იყოს დინამიური, საერთაშორისო სტანდარტების ანალოგიური და საერთო სახელმწიფო ეკონომიკურ სტრატეგიაში კონკრეტულად გაწერილი.

ჩვენი ქვეყანა არის მდიდარი ენერგორესურსებით, ჩვენს ქვეყანას გააჩნია იმისი პოტენციალი და გეოპოლიტიკური სტრატეგიული მნიშვნელობა, რომ საერთაშორისო პროექტებში მოხდეს სრული ჩართულობა და ფუნქციური მონაწილეობა. ეს ყველაფერი, საერთო ჯამში საქართველოს გაძლიერებას ემსახურება და ყოველი წარმატებული პროექტი თითოეული მოქალაქის წარმატებაა",-განაცხადა ენერგეტიკის მინისტრმა.