მამა პეტრე: „დღეს მორწმუნეები არ არსებობენ... სიყალბე და სიბეცეა გამეფებული“

საზოგადოება - 16:43, 19 Mar, 2015

26021

რას ნიშნავს ძველი და ახალი რწმენა?! - კითხულობს მამა პეტრე და ამასთან დაკავშირებით პოსტს სოციალურ ქსელში აქვეყნებს.
პეტრე კოლხი: „რას ნიშნავს ძველი და ახალი რწმენა?! ძველი და თანამედროვე მორწმუნე?! ძველი და ახალი ღმერთი?! უფალი, რომელსაც ჩვენ ვეთაყვანებით ან არ ვეთაყვანებით, იგივე იყო ვიდრე დასაბამიდან დღესამომდე.
მე ვიტყოდი, რომ დღეს მორწმუნეები არ, ან თითქმის არ არსებობენ. ამჟამინდელი მდგომარეობა იმდენად გაურკვეველია, დიდი ხანია ვფიქრობ და ანტიკურობიდან მოყოლებული, ჩვენი ჩათვლით, ანალოგი ვერ მოვუნახე. არსებობდა წარმართობა-პანთეიზმი, პოლითეიზმი, მონოთეიზმი, თეიზმი, ათეიზმი, მაგრამ დღეს ყველა მათგანში ერთად ვართ. გვიყვარს ქილიკი, განკითხვა, მარხვაში მწუხარე გამომეტყველება, მკაცრი ასკეტიზმი, უხეში განსჯა... საკმარისია მარხვა ერთ წუთს გადასცდეს, სამეფოდ გაშლილი სუფრებიდან ხშირ შემთხვევაში სამკურნალოდ მივყავართ. სიყალბეა, სიბეცეა, თვითკმაყოფილებაა გამეფებული. გამოიგონეს სამარხვო სოსისი, ძეხვი, ყველი, აგრეთვე მოწოდების სიმაღლეზე დგას სამარხვო მრევლიც.
ვისაც დიდმარხვაში ახსენდება, რომ თურმე ღმერთი არსებობს და თუ არ ვილოცეთ, არ მოგვცემს სახლებს, აგარაკებს, სამსახურებს, წარმატებებს... ძირითადად ხომ ამის გამო დავდივართ ტაძარში. ამას კი რწმენა არა, ვაჭრობა და აღებ-მიცემობა ჰქვია. ვილოცებ, თუ საცხოვრებელს შევიცლი, მარხვას დავიცავ, თუ ოჯახს შევქმნი... უმძიმესი მდგომარეობაა.
ღმერთი აბსოლუტური გონია, აზროვნებაა, შეცნობაა... ყოვლადსახიერი მარტო იმას რომ უსმენდეს, ვინც პირადი ინტერესებისთვის დადის ტაძარში, წარმოიდგინეთ რამხელა ბოროტება იქნებოდა. დავსვათ შეკითხვა-რას ემყარება ჩვენი რწმენა?! გვეცოდინება პასუხიც, ვინ არის ჩვენი ღმერთი“...