,,აქ სისხლისღვრა მოხდება… მშიერი ვკვდებით“ - ნასაკირალელ გლეხებს მიწას ართმევენ

საზოგადოება - 15:00, 19 Mar, 2015

3465

ოზურგეთის მუნიციპალიტეტის დაბა ნასაკირალის მოსახლეობამ, ამავე დაბაში, ხელისუფლების მიერ პირდაპირი მიყიდვის წესით 12 ჰექტარი მიწის კომპანია "პროგრეს-პლიუსზე" გადაცემა გააპროტესტეს.

"41 ოჯახი საერთოდ მიწის გარეშე ვრჩებით, ჩვენ ამ მიწას ათეული წლებია ვამუშავებთ და ისაა ჩვენი ერთადერთი შემოსავლის წყარო. არავითარ შემთხვევაში არ დავთმობთ, აქ მკვლელობები და სისხლისღვრა მოხდება"-განაცხადეს გლეხებმა დღეს დაბაში გამართულ აქციაზე.

სოფლის მოსახლეობამ თავიანთიი დეპუტატი შოთა ართმელაძეც გააკრიტიკა, რომელმაც გლეხებს გაყიდვის პროცესი დაუმალა.

"თუ სიტუაცია ჩვენს სასარგებლოდ არ გადაწყდება და ხელისუფლება მხარში არ დაგვიდგება მაშინ გადაგვასახლონ ბარემ, მიწა არა, არაფერი არ გვაქვს მშიერი ვკვდებით, მთავრობააა ეს რაც გვყავს? არა და აქციებს ოზურგეთშიც გავმართავთ და თბილისშიც"-უთხრა "გურიის მოამბეს" აქციის ერთერთმა მონაწილემ.

დაბა ნასაკირალში 12 ჰექტარი ჩაის პლანტაცია შპს "პროგრეს +" 2003 წლიდან აქვს 10 წლიანი იჯარით, 2014 წელს, საიჯარო ვადის გასვლის შემდეგ კომპანიამ ეს ტერიტორია შეისყიდა.

გასული 10 წლის განმავლობაში კომპანია მიწებით არ სარგებლობდა და მას ადგილობრივები იყენებდნენ.

თეა იოსელიანი, გურია