არასამთავრობო ორგანიზაცია „სამართლის თაობა“ მთაწმინდის გამგეობასთან აქციას მართავს. ისინი გამგეობაში არსებულ ნეპოტიზმზე და კორუფციის ფაქტებზე საუბრობენ.

აქციაზე შეკრებულებს ადგილზე მიტანილი აქვთ ტრანსპარანტები "ოროსნების კანტორა", "გადადგეს გამგებელი და ჩაჭრილი მოადგილეები", "უსაქმურები სალში" და "ჯოკია ბოდოკიას მერია".

მათი ინფორმაციით, გამგეობის ბიუჯეტის ხარჯზე, გამგებლის მოადგილეს-ქუთათელაძეს დასაქმებული ჰყავს საკუთარი მეგობრები.

"ახლადდანიშნული ადამიანების უმრავლესობა არის პარტია "ქართული ოცნების" წევრი.

გამგეობის სარგებლობაში მყოფი მანქანებით სარგებლობენ თანამშრომლების ოჯახის წევრები და "ოცნების" პარტიული აქტივი.

უფასო სასადილოებში პოლიტიკური ნიშნით ხდება ბენეფიციართა დაკმაყოფილება და ამის გამო, უამრავი სოციალურად დაუცველი ადამიანი ვერ სარგებლობს უფასო კვების პროგრამით.

რაიონის გამგეობაში დასაქმებული თანამდებობის პირები ბოროტად იყენებენ მინიჭებულ უფლება-მოსილებებს და ითხოვენ საკუთარი ან ოჯახის წევრების განცხადებების საფუძველზე სხვადასხვა სოციალურ დახმარებებს, როგორიცაა მათი კუთვნილი საცხოვრებელი სახლების სარეაბილიტაციო სამუშაოების განხორციელება, შეშით უზრუნველყოფა, სამედიცინო მკურნალობა და ა.შ!“, - აცხადებენ აქციის მონაწილეები.