ცნობილი ქართველი მსახიობი და მომღერალი, ვახტანგ კიკაბიძე, უკრაინის ხელისუფლებაში ქართველი პოლიტიკოსების დასაქმებას, უკრაინაში გამართულ პრესკონფერენციაზე გამოეხმაურა.

„მათ ყველას კარგად ვიცნობ და ვფიქრობ, რომ ძალიან კარგი გუნდი შეკრიბეთ. ამას მთელი პასუხისმგებლობით ვაცხადებ. რამდენიმე ძალიან საინტერესო ადამიანიც გყავთ, მაგალითად ეკა ზღულაძე, ძალიან ჭკვიანი კადრია“ - განაცხადა კიკაბიძემ.

მისი თქმით, პოლიტიკაში ახალგაზრდები უნდა მოვიდნენ და ქვეყანა ფეხზე დააყენონ, ძალის გაერთიანების შემთხვევაში კი მიზანს აუცილებლად მიაღწევენ.

„ყველაფერი კარგად იქნება. არ შეიძლება ყოველთვის პუტინმა გაიმარჯვოს. მთავარია, პირველ ეტაპს გავუძლოთ, რადგან ეს ყველაზე რთული იქნება“ - აღნიშნა მან.

ვახტანგ კიკაბიძემ პოლიტიკისა და ხელოვნების კავშირზეც ისაუბრა და განაცხადა, რომ არ ეთანხმება მოსაზრებას, თითქოს ეს ორი სფერო ერთმანეთისგან გამიჯნულია.

„ყველაფერი ურთიერთკავშირშია. რუსული აგრესიის წინააღმდეგ პროტესტის ნიშნად, 7 წელია მოსკოვში არ ვყოფილვარ“ - დასძინა მან და აღნიშნა, რომ მსოფლიოში მშვიდობის დამყარებაზე ოცნებობს.

უკრაინის მოვლენებზე კომენტირებისას, კიკაბიძემ განაცხადა, როცა ცუდ ხასიათზეა Россия 24-ს უყურებს.

„იქ ისეთ რაღაცეებს ამბობენ, თმები ყალყზე მიდგება ხოლმე. უკრაინის ტერიტორიის ანექსიას, ყველა საღად მოაზროვნე ადამიანი აღიარებს. თავის დროზე, სერგეი ლავროვმა განაცხადა, რომ რუსეთთან ომი საქართველო დაიწყო. როგორ შეიძლება საღ გონებაზე მყოფმა ადამიანმა ეს დაიჯეროს?!“- დასძინა მან.

შეგახსენებთ, ვახტანგ კიკაბიძემ უკრაინის ქალაქებში საკონცერტო ტურნე დაიწყო. საკონცერტო პროგრამის „ჩემი წლები - ჩემი სიმდიდრეას“ ფარგლებში გამართული პირველი კონცერტი, მომღერალმა მაიდანზე დაღუპულ „ზეციური ასეულის“ ხსოვნას მიუძღვნა.

ხატია ლაღიძე