„დაგასახიჩრებ, აგკუწავ, ხორცებს აგათლი“ - ეს მუქარა გია ჯაჯანიძის პირადი მიმოწერიდან არის...

„დღეს საქართველოში მაყურებელს არ აინტერესებს სხვისი პრობლემა, მას აინტერესებს ლანძღოს და ტალახში ათრიოს ადამიანი“ - ამბობს ადამიანების აგრესიით აღშფოთებული ტელეწამყვანი.

გია ჯაჯანიძე: „ ვიღაც ქალი მწერს - ეშაფოტზე ხარ ასაყვანი, ხორცები უნდა ჩამოგათალოთო, დაგასისხლიანებ, ძვლებში დაგამტვრევო, ზოგი შოუში ატომური ბომბის ჩაგდებით მემუქრება - შენ გარყვენი ერი და დაღუპე საქართველოო, ძალიან ბევრი მუქარაა.

ყველა ჩემს წინააღმდეგ არის, ძალიან დიდი აგრესია წამოვიდა. გეები ჩივიან რომ მათ დისკრედიტაციას ვეწევი და მათ უფლებებს ვარღვევ, ტრადიციულები მლანძღავენ - რატომ ეწევი ამათ რეკლამირებასო, მორწმუნეები ბრაზობენ თუ რატომ მომყავს ურწმუნოები და ეს საშინელი ხალხი გადაცემაში. ურწმუნოები კი მწერენ, რა უნდათ მღვდლებს სტუდიაშიო.

მე არ ვარღვევ კანონს, რასაც ირგვლივ ვხედავ იმას ვაკეთებ და იმას ვაჩვენებ, პროპაგანდას არავის არ ვუწევ. ყველაფერს ვეხები ნაწილ-ნაწილ. მინდა მთავრობას ვაჩვენო რაც ხდება საქართველოში, რომ იმუშაოს ერის მენტალობასა და ერის ფსიქოლოგიაზე. იმ ხალხს კი ვისაც აღიზიანებს ჩემი გადაცემა მოვუწოდებ სხვა არხებს უყურონ.

სირაქლემას პოზაში არის დღეს საქართველოს უდიდესი ნაწილი, მაშინ როცა ამბობენ ჩვენ მართლმადიდებლური ქვეყანა ვართო და ფარისევლები ამ ლოზუნგით გამოდიან, როგორ შეიძლება ქრისტიანულ ქვეყანაში ამხელა რაღაც მოხდეს? ასეთი აგრესია იყოს? ეს სერიოზული გამოსაკვლევია.

დღეს საქართველოში მძვინვარებს საშინელი ძალადობა, ეს არის ძალადობა ყველანაირი. პირადში მოწერილი მესიჯებით ვამბობ. ძალიან დიდი აგრესიაა. დღეს საზოგადოებას უნდა, რომ ვინმე ობიექტი აირჩიოს და ჯიჯგნოს. კარგშიც ცუდი უნდათ რომ დაინახონ.

ვფიქრობ ეს ყოველივე არის იმ არარეალიზებულობის ბრალი რაც ჩვენს ქვეყანაში სჭირს ბევრს. რეალიზაცია ვერ გაუწია თავის ნიჭს, გარეგნობას და აგრესიას ამ კუთხით ავლენს“.

წყარო: გაზეთი „პრაიმტაიმი“