„სამიზნე სიცოცხლისთვის“ - ძუძუს კიბოს თერაპიის მხარდამჭერი კაპანია

საზოგადოება - 13:01, 13 Mar, 2015

774

დღეს, 18:00 საათზე საკრებულოს დარბაზში ძუძუს კიბოს დამიზნებითი თერაპიის ხელმისაწვდომობის მხარდამჭერი საინფორმაციო კამპანიის „სამიზნე სიცოცხლისთვის“ ფარგლებში გაიმართება ქეთი კავალსკის ფოტოების გამოფენა. ღონისძიების ორგანიზატორია კოალიცია „ევროპა დონა საქართველო“.

გამოფენილ იქნება იმ ქალბატონების ფოტოები, რომელნიც დღეს ძუძუს კიბოს დასამარცხებლად იბრძვიან.

ღონისძიების მიზანია საზოგადოების ინფორმირება ძუძუს კიბოს დამიზნებითი თერაპიის ეფექტურობისა და მისი ხელმისაწვდომობის გაზრდის მხარდამჭერი კამპანიის შესახებ.

ღონისძიებას დაესწრება სასჯელაღსრულების N5 დაწესებულების ძუძუს კიბოთი დაავადებული მსჯავრდებული ქალბატონი, რომელიც საღამოზე არჩეული იქნება ძუძუს კიბოსთან ბრძოლის კოალიციის „ევროპა დონა საქართველო“-ს საპატიო წევრად და შესაბამისად, კოალიციის მხრიდან უფლებამოსილი იქნება დაავადების შესახებ ინფორმაცია (პრევენციული ღონისძიებები, თავის დაცვა) მსჯავრდებულებს გააცნოს.

სასჯელაღსრულებისა და პრობაციის სამინისტრო ყოველთვის თანადგომას უცხადებს მსჯავრდებულ ქალბატონებს, სთავაზობს მათ მრავალმხრივ სამედიცინო მომსახურებას, მათ შორის ძუძუს კიბოთი დაავადებულ მსჯავრდებულებს, რომელთაც სახელმწიფო სრულ მკურნალობას უფინანსებს.

სამინისტრო იზიარებს სლოგანს - „ძუძუს კიბო განაჩენი არ არის!“ და უერთდება მოცემულ აქციას.