რეზერვებით ხანძრის ჩაქრობა არ არის წამალი, ეს არის პრობლემის შეფუთვა და გადავადება- ქადაგიძე

ბიზნესი & ეკონომიკა - 21:25, 12 Mar, 2015

1439

ეროვნული ბანკის პრეზიდენტის, გიორგი ქადაგიძის განცხადებით, იმისთვის რომ ნეგატივი და კრიტიკა აირიდოს , რეზერვების ხარჯვა ყველაზე მარტივი გამოსავალია, თუმცა ქადაგიძის თქმით საბოლოო ჯამში ეს არასწორი პოლიტიკა იქნება და პრობლემას მხოლოდ დროებით მოაგვარებს და მომავალში უფრო დიდ პრობლემებს გამოიწვევს

"ჩემთვის პირადად ყველაზე მარტივი გადაწყვეტილებაა რეზერვების დახარჯვა. რატომ უნდა მივიღო უამრავი რაოდენობის კრიტიკა და ნეგატივი, როდესაც შესაძლებელია, გააკეთო ბევრი ინტერვენცია და თქვა, რომ "აი, გავაკეთე, რა ვქნა, არ გამოვიდა." მაგრამ არ არის ეს სწორი პოლიტიკა და ეს რომ არ არის სწორი პოლიტიკა, ამიტომ არ ვაკეთებთ ამას. ზუსტად ამას რომ არ ვაკეთებთ, რეიტინგებზე იყო აქ საუბარი - ამიტომაც აქვს ჩვენს მონეტარულ პოლიტიკას ნდობა. ამიტომაც არის სახაზინო ვალდებულებებზე საპროცენტო განაკვეთები ჩვენთან ერთ-ერთი ყველაზე დაბალი რეგიონში და იმავე დონის, რა დონისაც არის განვითარებული ქვეყნების. რეზერვებით ხანძრის ჩაქრობა არ არის წამლის ეფექტი, ეს არის შეფუთვა და გადავადება პრობლემის.”- განაცხადა ქადაგიძემ.

აღნიშნული განცხადება გიორგი ქადაგიძემ პარლამენტის ორი კომიტეტის გაერთიანებულ სხდომაზე გააკეთა და აღნიშნა, რომ ეროვნული ბანკი კონსტიტუციური მანდატის ფარგლებში მოქმედებს და იმის ფუფუნება არ აქვს, რომ ყველა მოვლენაზე კომენტარი გააკეთოს.

ნინო ზედგენიძე