ოზურგეთის მუნიციპალური საკრებულოს თავმჯდომარეს, დავით დარჩიას და ქალაქ ოზურგეთის მერს, ბეგლარ სიორიძეს, ქართულ ქორეოგრაფიაში შეტანილი წვლილის გამო, "საპატიო ქორეოგრაფის" წოდება მიენიჭათ.

ამის შესახებ "ნიუპოსტს" საქართველოს ქორეოგრაფიის მოღვაწეთა კავშირიდან აცნობეს.

კავშირის წარმომადგენლის თქმით, საქართველოს ქორეოგრაფიის მოღვაწეთა კავშირის გამგეობის 2015 წლის, 3 მარტის, #15 გადაწყვეტილებით, ბეგი სიორიძეს, დავით დარჩიას და ოზურგეთის რამდენიმე საჯარო მოხელეს "ქორეოგრაფიის საპატიო მოღვაწისა" და კავშირის "საპატიო წევრობა" მიენიჭათ.

ეს გადაწყვეტილება, ოზურგეთელ მაღალჩინოსნებს ამ დღეებში, უშუალოდ კავშირის თავმჯდომარემ, რევაზ ჭანიშვილმა აუწყა და ამის დამადასტურებელი-შესაბამისი სიგელები გადასცა.

დავით დარჩია, ოზურგეთის მუნიციპალიტეტის საკრებულოს თავმჯდომარე: - "ყველა კავშირს და ორგანიზაციას აქვს უფლება აირჩიოს საპატიო წევრები, გასაკვირი რა არის მაგაში? მართალია მოცეკვავე არ ვყოფილვარ და არც ქორეოგრაფიის განვითარებაში შემიტანია რაიმე წვლილი, მაგრამ დამასახელეს საპატიო წევრად და კითხეთ მათ, რატომ. მე რა უნდა გიპასუხოთ".

ბეგი სიორიძე; ქალაქ ოზურგეთის მერი: - "საქართველოს ქორეოგრაფიიის მოღვაწეთა კავშირის გამგეობის მიერ მომენიჭა საპატიო წევრის ტიტული. ხოლო რის საფუძველზე მომენიჭა აღნიშნული ტიტული, ეს თავად ქორეოგრაფიის მოღვაწეთა შემოქმედებით კავშირს უნდა ჰკითხოთ".

თეა იოსელიანი - გურია