თბილისის მერია ხელოვნების სკოლების დაფინანსებას სრულად ახორციელებს

საზოგადოება - 17:56, 11 Mar, 2015

543

თბილისის მერია უარყოფს გავრცელებულ ინფორმაციას, იმის შესახებ, რომ შეწყდა ხელოვნების სკოლების და ნიჭიერი სოციალურად დაუცველი ბავშვების დაფინანსება. გთვაზობთ, მერიის მიერ გავრცელებულ განცხადებას.
"გავრცელდა ინფორმაცია, თითქოს თბილისის მერიამ შეაჩერა ხელოვნების სკოლების პედაგოგთა ხელფასების გადახდა და, ასევე, ნიჭიერი და სოციალურად დაუცველი მოსწავლეების დაფინანსება, რაც არ ასახავს რეალურ მდგომარეობას და საზოგადოების შეცდომაში შეყვანას ემსახურება.

აღნიშნულთან დაკავშირებით გვინდა განვაცხადოთ, რომ თბილისის ხელოვნების სკოლები და მოსწავლე ახალგაზრდობის სახლები თვითდაფინანსებაზე მყოფი ორგანიზაციებია, რომელთა საქმიანობის რამდენიმე მიმართულებას თბილისის მუნიციპალიტეტის მერია აფინანსებს. კერძოდ: არამოთხოვნად სპეციალობებზე მოსწავლეთა, სასწავლო-შემოქმედებით პროცესში ხელოვნების სკოლების მაღალი აკადემიური მოსწრების მქონე მოსწავლეებისა და სოციალურად დაუცველ მოსწავლეთა უფასო სწავლება მერიის მხირდან სრულად ფინანსდება; 2015 წლის იანვრიდან კი ხელოვნების სკოლების კომუნალურ გადასახადებს, 50%-ის ნაცვლად, მერია 100 %-ით ფარავს.

გამომდინარე იქიდან, რომ 2015 წლიდან შეიცვალა დაფინანსების წესი, ასევე, მოხდა ერთიან სახაზინო სისტემაზე გადასვლა, მერიასა და სკოლებს შორის ახალი ფინანსური პროცედურების გამართვამდე, ადგილი ჰქონდა გარკვეულ შეფერხებებს. ერთ-ერთი ობიექტური მიზეზი იყო ისიც, რომ არ არსებობდა მაღალი აკადემიური მოსწრების მქონე მოსწავლეთა რაოდენობის მიხედვით ხელოვნების სკოლების დაფინანსების წესი, რომელიც 2015 წლიდან შევიდა ძალაში.

დღეისათვის ზემოაღნიშნული ყველა საკითხი მოგვარებულია, ხელოვნების სკოლები და მოსწავლე ახალგაზრდობის სახლები ყოველთვიურად იღებენ დაფინანსებას როგორც სოციალურად დაუცველ და არამოთხოვნად სპეციალობებზე მოსწავლეთა უფასო სწავლების, ისე კომუნალური ხარჯების ასანაზღაურებლად. რაც შეეხება სასწავლო-შემოქმედებით პროცესში მაღალი აკადემიური მოსწრების მქონე მოსწავლეების დაფინანსებას, თბილისის მერიის მიერ ამ მიზნით გამოყოფილი თანხები, მოსწავლეთა რაოდიენობის მიხედვით, უკვე ასახულია ცალკეული სკოლების ბიუჯეტებში და მათ შეუფერხებლად შეუძლიათ განახორციელონ შესაბამისი ფინანსური ოპერაციები.

თბილისის მერია მჭიდროდ თანამშრომლობს ხელოვნების სკოლებსა და მოსწავლე ახალგაზრდობის სახლებთან და მზად არის, დროულად და ეფექტიანად გადაჭრას მათ მიერ წამოჭრილი ნებისმიერი საკითხი,"-ნათქვამია მერიის მიერ გავრცელებულ განცხადებაში.