ვინ მიაქცევს ყურადღებას ამ შესანიშნავ ახალგაზრდას?

საზოგადოება - 11:27, 10 Mar, 2015

2670

საპრეზიდენტო ბიბლიოთეკის გამგეობის თავმჯდომარე ანდრო ბარნოვი საკუთარ სოციალურ გვერდზე თავდაცვის აკადემიის ერთ-ერთი მსმენელის შესახებ წერს, რომელიც „კიკ-ბოქსის“ რამდენიმე საერთაშორისო ტურნირის გამარჯვებული და საქართველოს ორგზის ჩემპიონია.
ანდრო ბარნოვის თქმით, ამ ახალგაზრდამ ტაილანდში გასამართ მსოფლიოს ჩემპიონატზე მიიღო მიწვევა , მაგრამ საჭირო დაფინანსებაზე თავდაცვის აკადემია უარს ეუბნება, ასევე უარი მიიღო სპორტის სამინისტროსგანაც.

ბარნოვი საზოგადოებას ახალგაზრდა სპორტსმენის დახმარებისკენ მოუწოდებს.

"მოკლედ, არ ვასახელებ სახელს, თუმცა ეროვნული თავდაცვის აკადემიისა და თავდაცვის სამინისტროს ხელმძღვანელებმა კარგად უნდა იცოდნენ, ვისაც ვგულისხმობ.

თავდაცვის აკადემიის მსმენელს, ძალიან მაგარ ახალგაზრდას, რომელიც არის "კიკ-ბოქსის" რამდენიმე საერთაშორისო ტურნირის გამარჯვებული, საქართველოს ორგზის ჩემპიონი და ამ ყველაფერს სწორედ აკადემიაში სწავლის პერიოდში მიაღწია, რომელიც მაგალითია თანატოლებისთვის, მოუვიდა მოწვევა მსოფლიო ჩემპიონატზე ტაილანდში. აკადემიამ დაფინანსებაზე უარი უთხრა (როგორც ვიცი, 10 ათასი ლარია საჭირო).

რადგან აკადემიამ თავად არაფერი გააკეთა, დაფინანსების თხოვნით სამინისტროს მიმართა კიკ-ბოქსისა და ტაიბოქსის ფედერაციის პრეზიდენტმა. უშედეგოდ.

მინდა, ვთხოვო ყველას, ვისაც ხელეწიფება: ჯერ კიდევ არის მცირე დრო (ჩემპიონატი ამ თვეში იმართება) და იქნებ, დააფინანსოთ ეს კარგი კაცი? დაუკავშირდით თავდაცვის აკადემიას, იმედია არ დაგიმალავენ. სახელს მეც გეტყვით პირადში თუ მომწერთ,"- წერს ანდრო ბარნოვი სოციალურ ქსელში.