„კრედიტები რომ გაქვს აკიდებული, სამსახურიდან წადიო რომ გეტყვიან და თავში ქვა გიხლიაო, მაგაზე მადლობას არ ეუბნებიან“, - ამბობს რუსთავი 2-ის დატოვების შემდეგ გეგა ფალავანდიშვილი, როგორც ირკვევა არხის ხელმძღვანელობის გადაწყვეტილება მისთვის მოულოდნელი იყო.

გეგა ფალავანდიშვილი: როგორც უნდათ, არ უნდათ, ნუ უნდათ. ალბათ, განიხილეს და კადრების ოპტიმიზაციას აკეთებენ. ჩვეულებრივი პროცესია, ზოგს უშვებენ, ზოგს ხელფასს აკლებენ…

– ასეთი უმნიშვნელო თანამშრომელიც არ ყოფილხარ…

– უფრო მნიშვნელოვანს ნახავენ. მე ჩემი გავაკეთე. მობეზრდათ, ცვლილებები უნდათ. მე ფაქტი მომახსენეს და კარგით-მეთქი.

– როდის გაიგეთ ამ გადაწყვეტილების შესახებ?

– გასული კვირის ორშაბათს. HR-ისგან გავიგე და დირექტორსაც ველაპარაკე. ერთმანეთს ხელი ჩამოვართვით, წარმატება ვუსურვეთ და დავიშალეთ. ხუთშაბათს დავწერე, ხელფასი დამერიცხა-მეთქი. კომპენსაციასაც მომცემენ (რამდენიმე თვის ხელფასს) და ასე ტკბილად წამოვედი.

– მოულოდნელი იყო?

– სამსახურიდან რომ გიშვებენ, ყოველთვის მოულოდნელია. მანამდე ყველაფერი მშვენივრად იყო. აღარ ვჭირდებოდი, ალბათ. ან სხვა გეგმები აქვთ. მე არ ვარ საჭირო. ნიკას უნდა ჰკითხოთ რა გეგმები აქვთ.

– არხიდან უშვებენ თანამშრომლებს?

– არ ვიცი. შეტყობინების ოფიციალური მიზეზი ეს იყო – ხარჯების ოპტიმიზაციას აკეთებენ. შესაბამისად, თანამშრომლებისაც. ნიკასთან გაარკვიეთ, მე სხვა რამ მეხებოდა ტელევიზიაში.

– შენი მოვალეობები ვის დაეკისრება?

– არ ვიცი. ალბათ, რამდენიმე ადამიანზე გადაანაწილებენ. მე ერთად ბევრი რამ მებარა. არა მგონია, ვინმე ჩემსავით გიჟი აღმოჩნდეს, ვინც ამ ყველაფერს ერთად აიკიდებს. მარკეტინგის, პროდუქციის შესყიდვა და პროგრამები მებარა. ყველაფერს ჩემს ჭკუაზე არ ვაკეთებდი, განვიხილავდით და ისე კეთდებოდა. გარდა ამისა, ხან – „მოდი, წამყვანი იყავი“ და „ხან მოდი, ჟიურის წევრი“ იყავი.

– გულისტკივილი, წყენა გაქვთ?

– არა. მე რატომ უნდა მქონდეს? საკმაოდ ბევრი გავაკეთე, ბევრიც ვისწავლე. ახალი ავითვისე. მე უფრო მოგებულში ვარ, ბევრად. მადლობა ყველას ამ შვიდი წლისთვის, თანამშრომლებს, პარტნიორებს, არაჩვეულებრივ ხალხს კომპანიის შიგნით და გარეთ.

– ისვენებ?

– დასვენება მაინცდამაინც არ გამომივა. დიდი ოჯახი მაქვს და ბევრი კრედიტი მაქვს დასაფარი.

– რას აპირებ?

– უნდა დავაწყო და დავგეგმო. გაიგებთ, ან არ გაიგებთ და ნახავთ. ტელევიზიაში არ დავბადებულვარ, მანამდე სხვაგანაც მიმუშავია და თანაც ბევრგან. რადიოდან და ტელევიზიიდან დაწყებული დიზაინით და არქიტექტურით დამთავრებული, ბევრ სფეროში მიმუშავია, ბევრი სხვა რამეც შემიძლია. მოშვების დრო ნამდვილად არ მაქვს. სამი ბავშვი, მშობლები, მოშვება არ გამოვა.

– „იქს ფაქტორს“ უგულშემატკივრებთ?

– ვუგულშემატკივრებ „რუსთავი 2“-ს. ამდენ ხალხთან ერთად ამდენი წელი რომ გამიტარებია და გვერდში მედგნენ, ყოველთვის გამიხარდება მათი წარმატება. „იქს ფაქტორზე“ ჩემი წვლილი მეც შევიტანე. საკმარისია. კომპიუტერში შევხედავ.

წყარო: „პრაიმტაიმი“