ექიმების რჩევები მომავალ დედებს და ანუკი არეშიძე სტუმრად ”ექიმებში”

საზოგადოება - 19:06, 07 Mar, 2015

9019

ხვალინდელი, ანუ სარვამარტო გადაცემა ქალებს ეხება. ქალბატონები - დედები, ორსულები და მომავალი დედები ბევრ საინტერესო და სასარგებლო ინფორმაციას მიიღებენ.
გადაცემის სტუმარი სამი შვილის დედა, უმშვენიერესი ანუკი არეშიძეა, რომელიც, მიუხედავად მისი პატარა ასაკისა, საუკეთესო დედაა და საკუთარ გამოცდილებას სხვა ახალგაზრდა დედებსაც გაუზიარებს.
რაც შეეხება რჩევებს ექიმებისგან, ამ შემთხვევაში შემოგთავაზებთ ბავშვის ბუნებრივი კვების შესახებ მნიშვნელოვან ინფორმაციას. მაშ ასე, რჩევები ექიმებისგან, რატომ უნდა გამოკვებოთ საკუთარი შვილი საკუთარი რძით:

1.დედის რძე ბავშვისთვის არის ვიტამინების, პროტეინებისა და ცხიმების იდეალური ნაზავი.

2. დედის რძე შეიცავს ანტისხეულებს, რომლებიც ბავშვს ეხმარება ვირუსებთან და ბაქტერიებთან ბრძოლაში.

3. სტატისტიკა აჩვენებს, რომ ბავშვებს, რომლებიც ძუძუთი იკვებებიან, გაცილებით უფრო დაბალი რისკი აქვთ, რომ მომავალში ასთმა, სხვადასხვა სახის ალერგია, დიაბეტი და სიმსივნე განუვითარდეთ.

4. ბავშვებს, რომლებიც 6 თვემდე მხოლოდ დედის რძით იზრდებიან, უფრო იშვიათად ემართებათ ყურის, რესპირატორული გზებისა და კუჭ–ნაწლავის დაავადებები.

5. ძუძუთი კვებას მხოლოდ ჯანმრთელობის მდგომარეობაზე არა აქვს გავლენა. ბევრი კვლევა აჩვენებს, რომ დედის რძით გაზრდილ ბავშვებს უფრო მაღალი აიქიუ(ანუ ინტელექტის კოეფიციენტი) აქვთ.

და კიდევ ერთი, მნიშვნელოვანი რჩევა ქალებს, ამჯერად პლასტიკური ქირურგისგან.
კოტე მათითაშვილი: „იცოდეთ, სიგარეტის მოწევა უფრო მეტად შეცვლის მკერდის ფორმას უარესობისკენ, ვიდრე ძუძუთი კვება. გარდა ამისა, სხვა ფაქტორები, მაგალითად ასაკი, გრავიტაცია, გენეტიკა და ცხოვრების წესი უფრო მეტად მოქმედებს მკერდის ფორმაზე, ვიდრე ძუძუთი კვება. ასე რომ, ეს არ არის საკმარისი მიზეზი იმისთვის, რომ ბავშვს ძუძუ არ ვაჭამოთ“.