„მე მძულს პედანტიზმი და ცრუ ერუდიცია“ - „კარმენი “ ბათუმსა და თბილისში

კულტურა - 14:22, 07 Mar, 2015

3311

ბათუმის ხელოვნებისა და მუსიკის ცენტრში ჟ. ბიზეს „კარმენი“ წარმოადგინეს. საოპერო დასს, რომელიც მრავალი წელია საქართველოს ამ ულამაზეს ზღვისპირა ქალაქში მოღვაწეობს, ბევრი გულშემატკივარი ჰყავს თბილისისა და ქუთაისის მუსიკალურ საზოგადოებაში...
დასის არაერთი ახალგაზრდა და ნიჭიერი წევრი საზღვარგარეთაც დიდი წარმატებით მოღვაწეობს. „კარმენი“, რომელიც მსოფლიო ოპერის საუკეთესო ხუთეულში შედის, ბათუმში რეჟისორმა გიზო ჟორდანიამ დადგა. თბილისში, „კარმენს“ ბათუმის საოპერო დასი აპრილში იმღერებს.

კახი ლაზარიშვილი, ჟურნალისტი, ხელოვნებათმცოდნე: „კარმენს“, კიდევ ერთხელ სიამოვნებით დავესწარი. არაჩვეულებრივი სპექტაკლია.უჩვეულო დეკორაციული გადაწყვეტით, თითქოს სადა და უპრეტენზიოა გიზო ჟორდანიას მიერ ჩაფიქრებული და წარმოდგენილი „კარმენი, მაგრამ მსმენელის ყურადღებას იქცევს საოპერო სპექტაკლისთვის უმნიშვნელოვანესი ესთეტიკური მხატვრულ-შემოქმედებითი მხარე, რომელიც ჩემი აზრით პომპეზურობას სძენს სპექტაკლის ოთხივე მოქმედებას. სპექტაკლში მონაწილე სოლისტ-მომღერლების ვოკალურ-არტისტული სტილი და გამოხატვის რეალისტური ფორმები, მათი სულიერი თუ ემოციური განცდები, ვნებები, გონივრულად და გემოვნებიანად გადმოსცემს ოპერის პერსონაჟების ხასიათს-თავისი შეცდომებითა და ნაკლოვანებებით, პრინციპულობით, ღელვითა და მკვეთრი რეაქციებით.

„მე მძულს პედანტიზმი და ცრუ ერუდიცია“ ამბობდა ჟ. ბიზე და შემსრულებლისგან გამართულ ვოკალთან ერთად ითხოვდა აქტიორულ-გამომსახველობით კავშირს მისი ოპერების პერსონაჟებთან.
კომპოზიტორის მოთხოვნებს ზედმიწევნით ითვალისწინებდნენ ამ სპექტაკლში ბათუმის ოპერის ახალგაზრდა სოლისტები-ინგა ჯახუტაშვილი, ირაკლი კახიძე, ზაზა ხამათაშვილი, ტანია ჯიქია, სულხან ჯაიანი და სხვა სოლისტები, ასევე გუნდი და ორკესტრი და მთელი საშემსრულებლო არსენალით, ლამაზი ხმებით, ძლიერი ჟღერადობით, შთამბეჭდავი ვოკალით, ნიჭითა და ენერგიით, ნამდვილი ხასიათებით, საოცრად პოზიტიურად განაწყობენ სპექტაკლზე მოსულ პუბლიკას.
მინდა წარმატება ვუსურვო ბათუმის საოპერო სტუდიის ახალგაზრდულ დასს, ვუსურვო ბევრი საინტერესო პრემიერა და გულშემატკივართა სიმრავლე“.

სპექტაკლის დამდგმელი დირიჟორი ზაზა აზმაიფარაშვილი გახლავთ. ბათუმში ის სამხატვრო ხელმძღვანელის, პროფესორ მარინა ჯახუტაშვილის მიწვევით ჩავიდა. დასს მასთან სხვადასხვა სპექტაკლებზე მუშაობის მრავალწლიანი გამოცდილება აქვს.