სკანდალურად გახმაურებული “ამერიკელი სნაიპერის” პრემიერა თბილისში

კულტურა - 15:03, 06 Mar, 2015

1368

დღეს, 6 მარტს, კლინტ ისთვუდის ოსკაროსანი ფილმის “ამერიკელი სნაიპერის” პრემიერა კინოთეატრ “ამირანში” გაიმართება. ფილმში მთავარ როლს ჰოლივუდის ვარსკვლავი ბრედლი კუპერი ასრულებს. “ამერიკელი სნაიპერი” 2015 წლის ყველაზე სკანდალური ამერიკული ფილმია და მისმა შემოსავალმა ამერიკულ კინოგაქირავებაში 90 მილიონი დოლარი შეადგინა. ეს არის რეალურ ამბავზე დაფუძნებული, ბიოგრაფიული დრამა ამერიკის ისტორიაში ყველაზე ლეტალური სნაიპერის კრის კაილის შესახებ, რომელმაც ოფიციალური მონაცემებით სამსახურეობრივი მოვალეობის შესრულებისას 160 ადამიანი მოკლა. ის თავდაპირველად საკუთარი სამშობლოსა და მეგობრების დამცველი იყო, მაგრამ ომის სისასტიკემ ნამდვილ მტაცებლად აქცია. კრის კაილი 4 - ჯერ იყო ერაყში და მონაწილეობდა საბრძოლო მოქმედებებში. ამერიკელი სნაიპერი ომს რამდენჯერმე გადაურჩა, მაგრამ საბოლოოდ მაინც ტყვიამ იმსხვერპლა. ის და მისი მეგობარი ფილმის გადაღებების დაწყებამდე რამდენიმე თვით ადრე დ 25 წლის ომის ვეტერანმა ედი რეი რუთმა, გამოასალმა სიცოცხლეს, რომელსაც კაილი ომის შედეგად მიღებული ტრამვების მოშუშებაში ეხმარებოდა. მოტივი რის გამო მოკლა კრის კაილი რუთმა დღემდე უცნობია, მას სამუდამო პატიმრობა მიესაჯა, გასაჩივრების უფლების გარეშე. მიუხედავად იმისა რომ ამერიკულ საზოგადოებაში არ წყდება კამათი იმის შესახებ, კრის კაილი იყო, თუ არა გმირი, რეჟისორმა ფილმში მისი პერსონაჟი მაყურებელს გააცნო და წარუდგინა,როგორც ამერიკის გმირი. ფილმი ამერიკის უმაღლესი კინოაკადემიის დაჯილდოებაზე 6 ნომინაციაში იყო წარდგენილი და 1 ოსკარიც მოიპოვა.

დღეიდან მის შეფასებას ქართველი მაყურებელი კინოთეატრ “ამირანში” შეძლებს.