თბილისში ყოველდღიურად მატულობს იმ მაღაზიების რაოდენობა, რომლებიც მუშაობას აჩერებენ. ამის მიზეზი კი გაძვირებული პროდუქცია და შემცირებული მყიდველია. მხოლოდ ლილოს სავაჭრო ცენტრში უკვე ათეულობით მაღაზია დაიკეტა. მცირე მეწარმეები ახალი საქონლის შემოტანაზე აღარ ფიქრობენ. ამ ეტაპზე ისინი არსებული პროდუქციის რეალიზაციაზე ზრუნავენ.

„ვაჭრობა აღარ არის, კლიენტი აღარ მოდის. ამის მიზეზი პირველ რიგში არის ის, რომ გაძვირდა დოლარი, ხალხს ფული აღარ აქვს“, - ამბობენ ლილოში არსებული ტანსაცმლის მაღაზიეის გამყიდველები.

ფასებმა მოიმატა მეორადი მაღაზიებში არსებულ საქონელზეც. ამის მიზეზი ის არის, რომ ისინი პროდუქციას დოლარში ყიდულობენ და ლარში ყიდიან. სავალურო კრიზისის გამო კი მოგებას ვეღარ ნახულობენ.

„მყიდველი არ შემოდის, ადრე უფრო იყო მუშაობა, ეხლა ვაჭრობა მკვდარია“, - ამბობს მეორადი საქონლის მაღაზიის გამყიდველი რომან ენუქიძე.

იგივე პრობლემაა ელიავას ბაზრობაზე, სადაც ამბობენ, რომ პროდუქცია უმეტეს შემთხვევაში უცხოეთიდან შემოაქვთ და შესაბამისად დოლარს იხდიან. ფასებს ვერ ზრდიან რადგან რემონტის გაკეთების მსურველთა რაოდენობა ქვეყანაში ასევე შემცირდა.