კომპანია „ცენტრ პოინტის“ მიერ დაზარალებული კლიენტები მთავრობის კანცელარიასთან ხვალ აქციას გამართავენ.

როგორც აქციის ორგანიზტორები ამბობენ, კომპანიის წარმომადგენლები დღემდე აგრძელებენ დაზარალებულების, სასამართლოსა და პროკურატურის თაღლითური გზით მოტყუებას.

მათი ინფორმაციით, „ცენტრ პოინტის“ ხელმძღვანელობა სხვადასხვა თაღლითური ხერხებით აიძულებენ დაზარალებულებს ახალ-ახალ კონტრაქტებზე ხელმოწერას, ხოლო სასამართლოში აცხადებენ, რომ მათ მიერ ხდება დაზარალებულების ეტაპობრივად დაკმაყოფილება.

აქციის ორგანიზატორებს კონკრეტული მოთხოვნები აქვთ პრემიერი-მინისტრის ირაკლი ღარიბაშვილის, მთავარი პროკურორის გიორგი ბადაშვილის და თბილისის პროკურორის მიხეილ შაყულაშვილის მიმართ.

„1.დაიწყოს გამოძიება ყველა ობიექტზე (დაკიდებული ბაღები, დიდი დიღმის ოაზისის მე-14 კორმუსი და სხვა). 2. გასაჯაროვდეს საქართველოს მთავარ პროკურატურაში მიმდინარე გამოძიების მასალები, რომლებიც შეეხება ცენტრ პოინტის და დექსუსის მიმართ არსებულ ახალ სისხლის სამართლის საქმეს. 3. არ იქნას გაფორმებული საპროცესო შეთანხმებები ბრალდებულებთან. 4. საქართველოს მთავარმა პროკურატურამ უზრუნველყოს სასამართლოზე შუამდგომლობის დაყენება, რათა ბრალდებულების და მათთან დაკავშირებული პირების უძრავ-მოძრავ ქონება გადაცემული იქნას დაზარალებულთა ამხანაგობებზე. 5. დადგეს სამშენებლო კომპანია „ცენტრ პოინტის“ ყველა თანამშრომლის პასუხისმგებლობის საკითხი. დამფუძნებლებთან ერთად სწორედ ისინი ახდენდნენ და ახდენენ დაზარალებულების შეცდომაში შეყვანას ცრუ დაპირებების მიცემის გზით. გამოძიებული და გადამოწმებული იქნას მათი პირადი ქონება, რადგანაც მათ სახელზე მოხდა და ხდება კომპანიის ქონების მნიშვნელოვანი ნაწილის გადაფორმება და გადამალვა“, - ნათქვამია აქციის ორგანიზატორების მიერ გავრცელებულ ინფორმაციაში.