სტატისტიკის ეროვნული სამსახური ფასების მატებასთან დაკავშირებით ინფორმაციას ავრცელებს.

როგორც საქსტატის ინფორმაციაშია ნათქვამი, მოცემულ პერიოდში ინფლაციის მაჩვენებლის ფორმირებაზე ძირითადი გავლენა იქონია ფასების ცვლილებამ შემდეგ ჯგუფებზე:

ჯანმრთელობის დაცვა: ჯგუფში ფასები გაიზარდა 0,9 პროცენტით, რაც თვის ინფლაციის მთლიან მაჩვენებელზე 0,09 პროცენტული პუნქტით აისახა. აღსანიშნავია ფასების მატება სამედიცინო პროდუქციის, აპარატურისა და მოწყობილობების ქვეჯგუფზე (2,4 პროცენტი). ფასები გაიზარდა ასევე ამბულატორიულ სამედიცინო მომსახურებაზე (0,7 პროცენტი) და საავადმყოფოების მომსახურებაზე (0,3 პროცენტი);

ტრანსპორტი: აღნიშნულ პერიოდში დაფიქსირდა ფასების 2,4-პროცენტიანი კლება, რაც თვის ინფლაციის მთლიან მაჩვენებელზე -0,27 პროცენტული პუნქტით აისახა. ფასები შემცირდა პირადი სატრანსპორტო საშუალებების ექსპლუატაციაზე (-4,3 პროცენტი).

თებერვალში ინფლაციის მაჩვენებელმა წინა თვესთან შედარებით 0.1% შეადგინდა და მის ფორმირებაზე მოცემულ პერიოდში ძირითადი გავლენა იქონია ფასების ცვლილებამ სწორედ ჯანმრთელობის დაცვისა და ტრანსპორტის მიმართულებით.

წლიური ინფლაციის ფორმირებაზე ძირითადი გავლენა იქონია ფასების ცვლილებამ შემდეგ ჯგუფებზე:

ჯანმრთელობის დაცვა: ფასები გაიზარდა 6,4 პროცენტით, რამაც წლიური ინფლაციის მთლიან მაჩვენებელზე 0,67 პროცენტული პუნქტით მოახდინა გავლენა. ფასები გაიზარდა სამედიცინო პროდუქციის, აპარატურისა და მოწყობილობების ქვეჯგუფზე (11,1 პროცენტი), ამბულატორიულ სამედიცინო მომსახურებასა (4,4 პროცენტი) და საავადმყოფოების მომსახურებაზე (5,2 პროცენტი).

სურსათი და უალკოჰოლო სასმელები: მოცემულ პერიოდში ფასები გაიზარდა 1,9 პროცენტით, შესაბამისად ჯგუფის წვლილმა წლიური ინფლაციის მთლიან მაჩვენებელზე 0,60 პროცენტული პუნქტი შეადგინა. ფასების ზრდა დაფიქსირდა ქვეჯგუფებზე: ხილი და ყურძენი (18,6 პროცენტი), ხორცი და ხორცის პროდუქტები (4,2 პროცენტი). ამასთან ფასები შემცირდა ბოსტნეულსა და ბაღჩეულზე (-6,1 პროცენტი);

ალკოჰოლური სასმელები, თამბაქო: ფასები გაიზარდა 8,1 პროცენტით, რაც ინფლაციის მთლიან მაჩვენებელზე 0,42 პროცენტული პუნქტით აისახა. ფასები გაიზარდა თამბაქოს ნაწარმზე (10,6 პროცენტი);

ტრანსპორტის ჯგუფში ფასები შემცირდა 7,8 პროცენტით, რაც წლიურ ინფლაციაზე -0,94 პროცენტული პუნქტით აისახა. აღსანიშნავია ფასების კლება პირადი სატრანსპორტო საშუალებების ექსპლუატაციაზე (-12,9 პროცენტი). ამასთან ფასები გაიზარდა სატრანსპორტო საშუალებების შეძენაზე (10,1 პროცენტი).

ნინი კაციტაძე