"2013-2014 წლებში თბილისის მერიამ სასტუმროს მომსახურებაზე მხოლოდ 178 ათასი ლარი დახარჯა"

საზოგადოება - 16:42, 02 Mar, 2015

1150

თბილისის მერია არასამთავრობო ორგანიზაცია „საერთაშორისო გამჭვირვალობა - საქართველოს" მიერ გამოქვეყნებულ კვლევას პასუხობს, რომელიც მერიის მიერ სასტუმროს მომსახურებისთვისთვის 1.1 ილიონი ლარის დახარჯვას ეხება. გთავაზობთ თბილისის მერიის მიერ გავრცელებულ განცხადებას.

"არასამთავრობო ორგანიზაცია „საერთაშორისო გამჭვირვალობა - საქართველომ“ გამოაქვეყნა კვლევა, რომელშიც ნათქვამია, თითქოსდა თბილისის მერიას 1.1. მილიონი ლარი სასტუმროს მომსახურებისთვის დაუხარჯავს.

სამწუხაროდ, აღნიშნული ორგანიზაციის მიერ ჩატარებული კვლევა არ არის კვალიფიციური, ვინაიდან მის მიერ გამოქვეყნებული ინფორმაცია ეხება შეზღუდული შესაძლებლობების მქონე მოზარდთა სამკურნალო-სარეაბილიტაციო პროგრამას და არა მერიის მიერ დედაქალაქის სტუმრებისთვის გაწეულ ხარჯს.

შშმ მოზარდების სამკურნალო-სარეაბილიტაციო პროგრამის ფარგლებში ბავშვები ბორჯომსა და ურეკში სარეაბილიტაციო კურსს გადიან. 2013-2014 წელს ამ პროგრამით ჯამში 6070-მა მოზარდმა ისარგებლა. მიგვაჩნია, რომ ეს ერთ-ერთი ყველაზე საჭირო და გამართლებული პროგრამაა, რომელიც შშმ მოზარდების მხარდასაჭერად ხორციელდება.

ორგანიზაცია საკუთარ კვლევაში საერთოდ არ საუბრობს ამ საკითხზე და საზოგადოებას აწვდის მცდარ ინფორმაციას მერიის მიერ „არაგონივრულად“ დახარჯულ თანხებზე.

რეალურად, ორი წლის განმავლობაში თბილისის მერიამ ჯამში სტუმრების სასტუმროს მომსახურებისთვის 178 ათასი ლარი დახარჯა.

თბილისის მერია მზად არის, ითანამშრომლოს სამოქალაქო სექტორთან და მიაწოდოს მათთვის საინტერესო ყველა სახის საჯარო ინფორმაცია, თუმცა, ამავდროულად, მოვუწოდებთ როგორც „საერთაშორისო გამჭვირვალობა - საქართველოს“, ისე ყველა სხვა არასამთავრობო ორგანიზაციის წარმომადგენლებს, გამოიჩინონ მეტი ყურადღება და კვალიფიციურობა ამა თუ იმ საკითხის შესწავლისას."-ნათქვამია თბილისის მერიის მიერ გავრცელებულ განცხადებაში.

ლაშა ჯაფარიძე