„არა, ეს არ არის ჩემი სტატუსი“ - ზაზა ურუშაძის პირველი კომენტარი

საზოგადოება - 07:54, 02 Mar, 2015

2355

„არა, ეს არ არის ჩემი სტატუსი. ვიღაც თვითმარქვია და აფერისტი წერდა ჩემი სახელით და გვარით“ - ამბობს საქართველოში დაბრუნებული „მანდარინების“ რეჟისორი ზაზა ურუშაძე იმ სტატუსებთან დაკავშირებით, რომელიც „ოსკარის“ შემდეგ სხვადასხვა საინფორმაციოების მიერ გავრცელდა.

ზაზა ურუშაძე, რეჟისორი:„მე არანაირი სტატუსი არ დამიდვია საერთოდ. გაუქმებული მქონდა „ფეისბუქი“. ის კი არ ჩერდებოდა და ჩემი ძალიან ბევრი მეგობარიც დაიმატა, ორ დღეში 1200 კაცი. მერე, ამის გამო ჩემი აღვადგინე“.

როგორც ზაზასგანვე ირკვევა 5 საუკეთესო უცხოენოვან ფილმში მოხვედრილი „მანდარინები“ ამერიკის გარდა კიდევ 15-მა ევროპულმა ქვეყანამ შეისყიდა და მალე მაყურებელი სხვადასხვა ქვეყნის კინოთეატრების დიდ ეკრანებზე იხილავს. ფილმი და აპრილიდან ჩაეშვება დისტრიბუციაში. თავად ზაზამ კი ამერიკიდან მიიღო რამდენიმე შემოთავაზება ფილმის გადღებაზე.

ზაზა ურუშაძე: „გლობუსის ცერემონიაზე უფრო ვღელავდი. ამიტომ ეს ყველაფერი გავლილი გვქონდა. თუმცა, ოსკარის აღების შანსი გვქონდა და ღელვაც იყო თავისთავად. მაგრამ დიდად ნერვიულობა მაინც ვერ მოვასწარი, იქ იცით როგორ არის? სცენასთან ახლოს ლოჟაში უნდა დაჯდე გამოცხადების წინ, რომ მაშინვე ახვიდე სცენაზე, იქ გაგვიყვანეს მოულოდნელად, და რამდენიმე წუთში გამოაცხადეს კიდეც, ეს დათქმულ დროზე ბევრად ადრე მოხდა, ამიტომ ვერც მოვასწარი ნერვიულობა. ძალიან სწრაფად მოხდა ეს ყველაფერი.

-საქართველოში იყო კრიტიკაც, ამაზე რას იტყვით?
-არაფერს არ ვიტყვი, რა უნდა ვუპასუხო, ვერ ვხვდები... მთავარია, რომ მე ძალიან დიდ მხარდაჭერას ვგრძნობდი საქართველოდან. ახლა კი ჩემს მაყურებელს ვეტყვი, რომ ყველაფერი არის შესაძლებელი. ის რომ მანდარინები გახდა ოსკარის, ოქროს გლობუსის ნომინანტი, სატელიტ ჯილდო მიიღო, ე. ი შეძლება ჩვენს ქვეყანაში რაღაცების კეთება, რადგან ბევრი ნიჭიერი ადამიანია და ყველაფერი შეიძლება მოხდეს.
წყარო: გაზეთი „პრაიმტაიმი“