2 მარტს, Business Time Georgia თემაზე - „ეროვნული ვალუტის დევალვაცია და მისი შედეგები ქვეყნის ეკონომიკისთვის“ მრგვალ მაგიდას გამართავს

ბიზნესი & ეკონომიკა - 00:05, 02 Mar, 2015

1986

2 მარტს, სასტუმრო „ჰოლიდეი ინში“ ჟურნალ Business Time Georgia-ს ანალიტიკური სამსახური თემაზე - „ეროვნული ვალუტის დევალვაცია და მისი შედეგები ქვეყნის ეკონომიკისთვის“ მრგვალ მაგიდას გამართავს.

ღონისძიებაში მონაწილეობას ეროვნული ბანკის პრეზიდენტის მრჩეველი გიორგი ბაქრაძე, ფინანსთა მინისტრის მოადგილე გიორგი კაკაურიძე, საინვესტიციო სააგენტოს ხელმძღვანელი გიორგი პერტაია და ტურიზმის ადმინისტრაციის ხელმძღვანელი გიორგი ჩოგოვაძე მიიღებენ. ასევე მოწვეულები არიან ექსპერტები: რომან გოცირიძე, მერაბ კაკულია, მიხეილ ჯიბუტი, ლევან კალანდაძე, ირაკლი ლექვინაძე, ნოდარ ჭიჭინაძე, ბესო ალადაშვილი, გიორგი ღაღანიძე და სხვები. ღონისძიებას დაესწრებიან ორგანიზაციები: საქართველოს ბიზნეს ასოციაცია, ახალგაზრდა ეკონომისტთა ასოციაცია, ახალგაზრდა ფინანსისტთა და ბიზნესმენთა ასოციაცია (აფბა), კონსალტინგური კომპანია PMCG და სხვები.

„ეკონომიკური და საინვესტიციო პროცესები, რომელიც ახლა საქართველოში ხდება, ახალ ეტაპზე გადადის. ექსტენსიური ზრდის პერიოდი, დაფუძნებული ეკონომიკური ზრდის მრავალრიცხოვან ფაქტორებზე, წარსულში დარჩა. ახლა ის გზას უთმობს ინსტენსიურ ზრდას, რომელიც გამოწვევების ახალ წრეს აყალიბებს, რაც, თავის მხრივ, ჩვენგან ეკონომიკური განვითარების ხარისხობრივ პარამეტრებზე კონცენტრირებას და საქართველოს საინვესტიციო პოტენციალის რეალიზებას მოითხოვს. ამისთვის, აუცილებელია სახელმწიფოს, ბიზნესისა და ეკონომიკური პრობლემატიკით დაკავებული არასამთავრობო სექტორის ძალისხმევის გაერთიანება. ამასთან დაკავშირებით, ჩვენ გადავწყვიტეთ, რეგულარულად მოვაწყოთ ბიზნესისა და ეკონომიკის აქტუალური საკითხების განხილვა“, - აცხადებს ჟურნალის მთავარი რედაქტორი ლევან ჭითანავა.

ცნობისთვის: ამ ეტაპზე, „Business Time Georgia“-ს ანალიტიკური სამსახური სხვადასხვა კვლევებს და გამოკითხვებს ატარებს. მომავალში კი აპირებს გამოსცეს სხვადასხვა საინფორმაციო-ანალიტიკური და ანალიტიკურ-საპროგნოზო პროდუქცია, რომელსაც დაინტერესებულ პირებს შესთავაზებს.