"ცეცხლზე ნავთის დასხმა"- თუ ქადაგიძესთან ვინმეს კითხვები ქონდა ადრე უნდა დაესვა

"ცეცხლზე ნავთის დასხმა"- თუ ქადაგიძესთან ვინმეს კითხვები ქონდა ადრე უნდა დაესვა - ხუხაშვილი

ბიზნესი & ეკონომიკა - 15:49, 27 Feb, 2015

2190

ექსპერტი გია ხუხაშვილი ეროვნული ბანკის და მისი მმართველის მიმართ ბიძინა ივანიშვილის მხრიდან გამოთქმულ კრიტიკას გამოეხმაურა. როგორც გია ხუხაშვილი „ნიუპოსტთან“ საუბარში აღნიშნავს, მიუხედავად იმისა, რომ ის ივანიშვილის მიერ გამოთქმული კრიტიკის ნაწილს იზიარებს, თვლის, რომ განცხადება ცუდ დროს იყო გაკეთებული და არსებობდა რისკი, რომ ცეცხლზე ნავთის დასხმის ეფექტი ქონოდა.

„გუშინ ატეხილი აჟიოტაჟი და განცხადება არ იყო დროული და მიზანშეწონილი, რადგან სიტუაცია მიდიოდა სტაბილიზაციისკენ, არა მგონია, რომ ამ განცხადებების გამო რამე კატასტროფული მოხდეს საქართველოს ეკონომიკაში, მაგრამ ეს იყო ძალიან სარისკო, ეს გავდა ცეცხლზე ნავთის დასხმას.“- განაცხადა გია ხუხაშვილმა და აღნიშნა რომ ის ადამიანები ვინც ყოფილ პრემიერს ამ განცხადების გაკეთება ურჩია ან არაკომპეტენტურები არიან ან შეგნებულად სიტუაციის გასართულებლად გადადგეს ეს ნაბიჯი.

„მე არ ვარ მაღალი აზრის გიორგი ქადაგიძეზე, მაგრამ ამ მაჟორული ბრალდებებს საფუძველი რომც ქონოდა, გუშინ არ უნდა გაკეთებულიყო. ჩემის აზრით შექმნილ ვითარებაში გარკვეული წილი ეროვნული ბანკს აქვს, მაგრამ ის, რომ ეროვნული ბანკის ბრალია ყველაფერი და მთავრობა არაფერ შუაშია, ამას არ ვიზიარებ. ეს არის სოლიდარული პასუხისმგებლობის საკითხი“- აღნიშნა ექსპერტმა.

გია ხუხაშვილმა კომენტარი ქადაგიძის შესაძლო იმპიჩმენტზეც გააკეთა და აღნიშნა, რომ თუ ვინმეს ქადაგიძის მიმართ კითხვები ქონდა თავის დროზე უნდა დაესვა და არა ამ მძიმე ვითარებაში და ივანიშვილის განცხადების შემდეგ:

„საპარლამენტო უმრავლესობაში იმპიჩმენტზე საუბარი მოყვა კონკრეტულ განცხადებას, თუ რაღაც უნდობლობა და კითხვის ნიშნები იყო ქადაგიძის მიმართ, ის აქამდეც არ უნდა ყოფილიყო ეროვნული ბანკის მმართველი. მითუმეტეს, რომ არსებობს კითხვის ნიშნები ბანკებთან მიმართებაში მის წარსულ მოღვაწეობასთან დაკავშირებით. მაგრამ თუ ვინმეს კითხვები ქონდა მასთან ჯობდა ეს კითხვები თავის დროზე დაესვა და არა ამ მძიმე ვითარებაში.“- განაცხადა გია ხუხაშვილმა.

_{ნინო ზედგენიძე}