ექსკლუზივი: ფქვილი გაძვირდა - შესაძლოა პურის ფასმა მოიმატოს, რას აცხადებენ წისქვილკომბინატები

ბიზნესი & ეკონომიკა - 13:38, 24 Feb, 2015

4632

უნდა ველოდოთ თუ არა პურის გაძვირებას, ამ თემაზე ჯერ კიდევ ლარის კურსის ვდარნის პირველსავე დღეებში დაიწყო საუბრები. ,,ნიუპოსტის" ინფორმაციით, ფქვილი უკვე გაძვირდა და ეს არ არის გეგმიური გაძვირება, რომელსაც ადგილი აქვს გაზაფხულზე, არამედ პურის ფქვილის ამ ეტაპზე გაძვირება ეროვნული ვალუტის გაუფასურებას უკავშირდება, ხოლო რაც შეეხება საგაზაფხულო გემიურ გაძვირებას, სავარაუდოდ, ფასი კიდევ უფრო აიწევს. ,,ნიუპოსტის" ინფორმაციით, ფასმა ამ ეტაპზე 2-3 ლარით მოიმატა.

რას აცხადებენ ფქვილის მწარმოებელი კომპანიები - როგორც ,,ნიუპოსტის" კორესპონდენტს გორის წისქვილკომბინატის დირექტორი ესაუბრა, ლარის კურსის ვარდნის პარალელურად კომბინატმა ფქვილი ფასი გაზარდა.

შ.პ.ს "კარმენის" კომერციული დირექტორი „ნიუპოსტთან“ საუბრისას ამბობს, რომ ფქვილის ფასმა 2 ლარით მოიმატა. მერაბ დათვიაშვილი არ გამორიცხავს, ფქვილის ფასი კიდევ გაიზარდოს, რადგან მისი თქმით, მათ პროდუქცია რუსეთიდან, უკრაინიდან და ყაზახეთიდან შემოაქვთ და ხორბალში დოლარის გადახდა უწევთ.

„ჩვენ ძირითადად პროდუქციას ვყიდულობთ რუსეთიდან, უკრაინიდან და ყაზახეთიდან, ამას ვყიდულობთ დოლარში. ძალაუნებურად კურსი, რომ მაღლა მიდის პროდუქციის ფასიც იწევს, ფქვილის და ქატოსიც. დღეის მდგომარეობით შეძლებისდაგვარად ვყიდით დოლართან შეფარდებით. დღეის მდგომარეობით 39 და 38 ლარშიც ვყიდით თუ კიდევ მოიმატებს დოლარი ბუნებრივია გავაძვირებთ“, - ამბობს მერაბ დათვიაშვილი.

რაც შეეხება რუსთავში არსებულ კომპანია ,,თავთუხს", აქ ვითარება კიდევ უფრო მძიმეა. კომპანია გაჩერებულია. ,,ნიუპოსტთან" საუბარში კომპანია ,,თავთუხის" წარმომადგენელი აცხადებს, რომ ისინი ძირითადად იმპორტირებულ ხორბალზე არიან დამოკიდებულნი და ბოლო პერიოდის განმავლობაში ხორბლის შესაძენად, შესაბამისი ფინანსების მოძიება ვერ მოხერხდა.

წისქვილკომბინატ „ჯეომილის“ გაყიდვების მენეჯერის განცხადებით, პროდუქციის ფასი დოლარის კურსის ცვალებადობასთან ერთად იცვლება, დღეის მდგომარეობით ერთი ტომარა ფქვილის ფასი 39 ლარია, თუმცა კომპანიის წარმომადგენელი ფასების მატებას არ გამორიცხავს.

„ფასები იცვლება თითქმის ყოველკვირას, რაც დოლარი იცვლება იმასთან შედარებით ვცდილობთ მინიმალურაად შეიცვალოს ფასი. ბოლო ერთი თვის განმავლობაში ფასმა დაახლოებით სამი ლარით მოიმატა “- აცხადებს გიორგი ბერიანიშვილი ,,ნიუპოსტთან“ კომენტარში.

კომპანიის წარმომადგენლის განცხადებით იმის გათვალისწინებით, რომ ადგილობრივი ხორბალი უკვე აღარ არის და წისქვილკომბინატები იმპორტულ ხორბალზე მუშაობენ. ფასის ცვლილება პირდაპირ მიბმულია დოლარის კურსთან.

ფქვილის გაძვირების ფონზე მოიმატებს თუ არა პურის ფასი, ეს კითხვა ლოგიკურად ჩნდება. პურის გაძვირება კი ის ,,უკანასკნელი ბასტიონია", რომლის შემდეგაც პირველადი მოხმარების საგნებზე ფასების ზრდა სრულიად უკონტროლო გახდება. მოსახლეობა ზოგადად ფასების მატებას უკვე აპროტესტებს, „თუ ასე გაგრძელდა, დროა ქუდი დაიხურონ და წავიდნენ“ - ასე ეხმაურება ერთ-ერთი გორელი პროდუქტებზე ფასების ზრდას.