,,წარსული საჭიროა, მაგრამ მომავლის არდანახვა საშიშია“

,,წარსული საჭიროა, მაგრამ მომავლის არდანახვა საშიშია“ - ილია მეორე

საზოგადოება - 15:27, 22 Feb, 2015

2383

ხვალიდან დიდმარხვა იწყება. სრულიად საქართველოს კათოლიკოს-პატრიარქმა, უწმინდესმა და უნეტარესმა ილია მეორემ დიდი მარხვის მნიშვნელობაზე იქადაგა და აღნიშნა, რომ მარხვა არის ადამიანის სულიერი განწმენდა და ცოდვათაგან სულიერი გათავისუფლება. უწმინდესის თქმით, ყველაფერი უნდა გავაკეთოთ იმისათვის, რომ სულიერად ავმაღლდეთ.

"ხვალიდან იწყება დიდი მარხვა, მარხვა სინანულისა და აღდგომა სიხარულისა. ღმერთმა ინებოს, რომ ჩვენი ერი ამ მარხვის დროს განიწმინდოს" - განაცხადა ილია მეორემ.

უწმინდესმა საკვარიაო ქადაგებისას ადამიანის სულიერად დაცემაზე ისაუბრა და აღნიშნა, რომ ადამიანი სულიერად დაცემული და გაუბედურებულია.

,,წარსულში კაცობრიობა ასე დაცემული არ ყოფილა. ადამიანი ფიქრობს დღეს მხოლოდ მატერიალურზე და ვერ ხედავს, რომ ადამიანი სულიერად დაცემული და გაუბედურებულია. წარსულში ასეთი დრო, რომ ასე დაცემული ყოფილიყო კაცობრიობა, არ ყოფილა. ღმერთმა შეგინდოთ, ღმერთმა გაპატიოთ ცოდვები და ღმერთმა მოგცეთ მადლი სულიწმინდისა.

ადამიანი თვითონ დგება მაცხოვრის მარჯვენა ან მარცხენა მხარეს. ბოროტი, ურწმუნო ადამიანი, სასუფეველში ვერ გაძლებს, ეს იქნება მისთვის ტანჯვა, რადგან ის ბოროტებით არის შეპყრობილი. ყველა ადამიანმა უნდა იფიქროს თავის ცოდვებზე, ჩვენ ვცდილობთ დავინახოთ სხვების ცოდვები და არა საკუთარი. ეს ამდაბლებს ადამიანს და ამძიმებს", - განაცხადა პატრიარქმა.

ილია მეორემ მომავლის მნიშვნელობაზეც ისაუბრა და აღნიშნა, რომ წარსული ცხოვრება საჭიროა, მაგრამ აწმყოსა და მომავლის არდანახვა საშიშია. "ადამიანმა სწორად უნდა შეაფასოს ის ვითარება, რომელიც ჩვენს წინაშეა. ძალიან ხშირ შემთხვევაში ჩვენ ვცხოვრობთ ჩვენი წარსულით, წარსული საჭიროა, მაგრამ დღევანდელი დღის და მომავლის არდანახვა საშიშია. წარსულის მაგალითმა მომავალში უნდა გვიჩვენოს, რა გავაკეთოთ და რა არ გავაკეთოთ. რა არის თეთრი და რა არის კარგი", - აღნიშნა ილია მეორემ.