ის რაც ტაბუდადებული თემაა ბევრისთვის, მაგრამ აუცილებელია მასზე საუბარი, რუსთავი 2-ის ეთერში ექიმების განხილვის თემა სექსი გახლდათ.

პირველად ქართულ ტელესივრცეში ექიმები იმაზე ალაპარაკდნენ, რაც ჩვენს საზოგადოებაში გარკვეულ უხერხულობას იწვევს. მაყურებელმა უამრავი რჩევა მიიღო და მათი დახმარებით ბევრ მითსა და რეალობაში გაერკვა.

„ჩვენ გვინდა დავამსხვრიოთ ყველანაირი მითი და ფარდა ავხადოთ სექსთან დაკავშირებულ სინამდვილეს “- განაცხადეს ექიმებმა. სტუდიაში მყოფმა გოგონამ კი იმ სავალალო შედეგზე ისაუბრა, რაც არაინფორმირებულობას მოჰყვა.

„პირველად სექსუალური კავშირი 16 წლის ასაკში მქონდა, ჩემი შეყვარებული კი 17 წლის იყო. არცერთი არ ვიყავით ინფორმირებულნი ამ თემასთან დაკავშირებით და შესაბამისად თავიც არ დაგვიცვია.

მაშინ არც მეგონა რომ პირველი სექსის შემდეგ შეიძლება დავორსულებულიყავი, მაგრამ სამწუხაროდ ასე მოხდა. ჩემი ორსულობა ძალიან დიდი ტრაგედია იყო ჩემი ოჯახისთვის, ამას ისიც დაემატა, რომ ჩემმა შეყვარებულმა ყველაფერი უარყო და საერთოდ გაქრა. დედაჩემმა კი მიიღო ჩემს მაგივრად გადაწყვეტილება და აბორტის გასაკეთებლად წამიყვანა, ეს დღე ყველაზე მწარე და საშინელი დღე იყო ჩემს ცხოვრებაში.“

ეს არის ერთ-ერთი ისტორია იმ უამრავთაგან რომელიც გადაცემაში გაჟღერდა. „მე მინდა გითხრათ ყველას რომ არ ტეხავს სექსის შესახებ საუბარი“, - განაცხადა დავით ლოლაძემ, - „სექსზე ინფორმირებულობა ძალიან მნიშვნელოვანია საზოგადოებისთვის“... რუსთავი 2-ის ეთერში ექიმებმა სექსის პოზიტიურ შედეგებზე და სასწაულმოქმედ ძალაზეც ისაუბრეს. მათივე თქმით სექსი საუკეთესო რეცეპტია თითოეულის გასაჯანსაღებლად.

„უსაფრთხო სექსი შესანიშნავი გზაა სტრესის შესამცირებლად, იმუნური სისტემის გასაუმჯობესებლად და ორგანიზმში ბევრი სხვა რამის მოსაწესრიგებლად“.