მსახიობ მიშა გომიაშვილის მიერ უმცირესობებთან დაკავშირებით გაკეთებულ საჯარო განცხადებას „იდენტობის” გამოხმაურება მოჰყვა. „მოვუწოდებთ ყველა დამსაქმებელს, დაუყოვნებლივ შეწყვიტოს ბატონ გომიაშვილთან ყოველგვარი თანამშრომლობა“ - აცხადებს „იდენტობა“, - „წინააღმდეგ შემთხვევაში, ვიზრუნებთ იმაზე, რომ მისი ნებისმიერ დამსაქმებელისთვის ამიერიდან შეუძლებელი გახდეს ჰომოფობი დასის წევრებთან ერთად „გარყვნილ დასავლეთში“ გასტროლებით ტკბობა“.

ამ განაცხადმა მიშა გომიაშვილის კოლეგა ლელა ალიბეგაშვილი აღაშფოთა, რუსთაველის თეატრის მსახიობმა კოლეგას „ობიექტივის“ ეთერით მხარდაჭერა გამოუცხადა, რის შემდეგაც ძალიან მალევე გავრცელდა ინფორმაცია, - „შესაძლოა ამის გამო ლელა ალიბეგაშვილსაც პრობლემები შეექმნას“...

„რამდენადაც მითხრეს, ლელა ალიბეგაშვილის თეატრიდან გაშვებას ითხოვენ “ისინი”.- აცხადებს მსახიობი ნანა ხურითი. „არადა, ვიცნობ არატრადიციული ორიენტაციის ადამიანებს, რომლებიც ბევრად ღირსეულად იქცევიან, ვიდრე მათი “ვითომ დამცველები”.

ინფორმაციის გადასამოწმებლად „ნიუპოსტი“ თავად ლელა ალიბეგაშვილს დაუკავშირდა.

ლელა ალიბეგაშვილი: „არ დაიჯეროოოთ, ეს ტყუილია და არ შეესაბამება სიმართლეს... ეტყობა ვიღაცეები ძალიან ოცნებობენ ამაზე, დაიწერა კიდეც - „ლელა ალიბეგაშვილის რუსთაველის თეატრში მოღვაწეობას გადაეხედებაო“... ნეტავ, ვინ აპირებს ჩემი საქმის გადახედვას?! ძალიან მაინტრესებს... ეს არის ჭორი. ჩემი რეჟისორი მე პატივს მცემს და ჩემს გაშვებასაც არავინ აპირებს, ასე რომ...

არაფერი ისეთი მე იქ არ მითქვამს, პირიქით, ვფიქრობ რომ ყველა ქართველის სათქმელი გავაჟღერე.

მე გავაპროტესტე ის მუქარა რომელიც მიშა გომიაშვილის მისამართით წამოვიდა. იდენტობამ ზიზღით სავსე წერილი გაავრცელა. მე ჩემი მხარდაჭერა საკმაოდ ემოციურად გამოვხატე და განვაცხადე - არ გაბედონ მეორედ მუქარის და მოწოდებების გავრცელება- მეთქი. მუქარებისა და მოწოდებების გავრცელება ეს კანონიერია?!

მათ მოუწოდეს დამსაქმებლებს რომ მიშა გომიაშვილი არასად არ გადაიღონ, თეატრიდან გაუშვან, მათივე განცხადებით - თუ არ შეასრულებთ ამას ჩვენ ჩავრთავთ ყველა მექანიზმს და ისე გავაკეთებთ, რომ მათ უცხოეთში გასვლის საშუალებას არ მივცემთო.

ვინ არის ეს იდენტობა? ვერც კი ხვდებიან რომ ძალიან ცუდ საქმეს უკეთებენ არატრადიციული ორიენტაციის ხალხს, რადგან მე პირადად ვიყავი საკმაოდ ლოიალურად განწყობილი მათ მიმართ, საერთოდ ვერ ვიტან როდესაც ვიღაცა ვიღაცას ჩაგრავს. ვინც არ უნდა იყოს, წინააღმდეგი ვარ ნებისმიერი ძალადობის, მაგრამ როდესაც უკვე ეს გარკვეული თემი ძალადობას ახდენს ჩვენზე, ტრადიციული ორიენტაციის წარმომადგენლებზე ეს უკვე მეტის მეტია და რეტის რეტია მეთქი - განვაცხადე. ეტყობა ამ სიტყვებმა გააბრაზა „იდენტობა“ .