2002-2003 წლებში მოკლული გიორგი გაბუნიას მამა ლევან გაბუნია, იური ვაზაგაშვილთან შეხვედრას იხსენებს.

როგორც „თბილისელებთან“ ინტერვიუში გაბუნიამ განაცხადა, ისინი ერთმანეთს „ნაციონალური მოძრაობის“ წინააღმდეგ გამართულ აქციაზე ხვდებოდნენ.

„მაშინ რომ მე ეს მეთქვა, ამას ისე აღიქვამდნენ, თითქოს მე „ნაციონალურ მოძრაობას“ შევეკარი. გგონიათ ისინი არ მთხოვდნენ, გამოვსულიყავი და ამაზე მელაპარაკა?! მე ვიცოდი, რომ ისინი ამ საქმეს საჯაროდ არ გახსნიდნენ, უბრალოდ მე გამომიყენებდნენ ზურას წინააღმდეგ. ამ წლების განმავლობაში მეც ვებრძოდი „ნაციონალურ მოძრაობას“. ერთ ხანს „ეროვნული ფორუმის“ წევრიც ვიყავი. ერთი მიტინგი არ დამიტოვებია, ყველა აქციას ვესწრებოდი. ისეთი შემთხვევებიც იყო, როდესაც მე და იური იმ შეხვედრებზე ერთმანეთს ვხვდებოდით, თუმცა ჩვენ შორის ახლო კონტაქტი არ ყოფილა. იური ვაზაგაშვილმა „ნაციონალური მოძრაობის“ წინააღმდეგ ბრძოლა მისი შვილის გარდაცვალების შემდეგ დაიწყო, მანამდე მას მშვენიერი ურთიერთობა ჰქონდა ნაციონალებთან, კონკრეტულად კი ერეკლე კოდუასთან. მე ვიცი რომ ამ თანხის გადაცემა, რომლითაც საქმე ჩაიფარცხა, კოდუას დახმარებით მოხდა“, - განაცახადა გაბუნიამ.

შეგახსენებთ ლევან გაბუნიამ გადაცემა „არჩევანში“ განაცხადა, რომ მისი შვილი გიორგი გაბუნია შეესწრო ბექა პაპუაშვილის მკვლელობას, რომელიც ზურაბ ვაზაგაშვილმა 2002 წელს ჩაიდინა, შემდეგ კი ვაზაგაშვილმა მოწმეც მოიშორა და გიორგი გაბუნიაც მოკლა. 2002 წელს გაბუნია გაურკვეველ ვითარებაში გარდაიცვალა.