პათოსური გამოსვლების მომხრე არ ვარ, საქმიან გამოსვლებს ვანიჭებ უპირატესობას- დავით ასათიანი

საზოგადოება - 19:16, 14 Feb, 2015

1463

უზენაესი სასამართლოს თავმჯდომარეობის კანდიდატის დავით ასათიანის განცხადებით, პრეზიდენტთან გამართული 5-საათიან შეხვედრაზე ყველა კანდიდატს მიეცა საშუალება თავისი პოზიცია დაეფიქსირებინა.

მისივე თქმით, საინტერესო გამოსვლებთან ერთად, გარკვეულწილად იყო ზოგადი და პათოსური გამოსვლებიც, თუმცა ძირითადად, მათ წარმოაჩინეს თავიანთი ხედვა, თუ როგორი უნდა იყოს მართლმსაჯულების სისტემა.

„მე პირადად გავუზიარე პრეზიდენტს ჩვენი პოზიცია, რომ ადვოკატთა კორპუსი ამ უმნიშვნელოვანეს პოსტზე ხედავს მიუკერძოებელ, პრინციპულ და იურიდიული პროფესიიდან წამოსულ ადამიანს, რომელსაც გააჩნია მართლმსაჯულების სისტემაში საქმინაობის გამოცდილება და უცხო ელემენტი არაა ამ სისტემისთვის. ასევე, აქვს უნარი გააგრძელოს რეფორმები და საზოგადოებაში სასამართლოს ნდობა გააძლიეროს“, - განაცხადა დავით ასათიანმა.

მსჯელობა არ ყოფილა, რადგან პრეზიდენტმა განაცხადა, რომ კრიტერიუმების გადახედვა შეხვედრის მიზანი არ არის და სწორედ ამ კრიტერიუმების ფარგლებში გაიმართა მსჯელობა.

„ჩემი მხრიდან მიწოდებული იყო ხედვა, თუ რა გზებით უნდა მოხდეს სასამართლო დამოუკიდებლობის გაძლიერება, ხარისხიანი მართლმასჯულების დამკვიდრება და სასამართლოს მიმართ საზოგადოებრივი ნდობის ამაღლება “, - განაცხადა დავით ასათიანმა.

დავით ასათიანმა ასევე განაცხადა, რომ შეხვედრის მიმდინარეობისას იყო ცეცხლოვანი და პათოსური გამოსვლებიც, რომლებიც არ ჯდებოდა შეხვედრის საერთო საქმიან კონტექსტში“.

„ცეცხლოვანი და პათოსური გამოსვლების მომხრე არ ვარ, საქმიან გამოსვლებს ვანიჭებ უპირატესობას”,- აღნიშნა ასათიანმა.

ამასთან, უზენაესი სასამართლოს თავმჯდომარეობის კანდიდატი სასიმოვნოდ გაკვირვებულია, რომ პრეზიდენტმა მართლმსაჯულებასთან დაკავშირებული სამართლებრივი საკითხებისადმი სიღრმისეული დაინტერესება და ცოდნა გამოავლინა.