უზენაესი სასამართლოს თავმჯდომარე უნდა იყოს ის, ვინც მოსამართლეების უფლელებს დაიცავს

უზენაესი სასამართლოს თავმჯდომარე უნდა იყოს ის, ვინც მოსამართლეების უფლელებს დაიცავს - ხატიაშვილი

საზოგადოება - 12:09, 13 Feb, 2015

1391

„საქართველოს ადვოკატთა ასოციაციამ“ უზენაესი სასამართლოს თავმჯდომარის პოსტზე ასოციაციის თავმჯდომარის ზაზა ხატიაშვილის ინიციატივით ადვოკატი დავით ასათიანი წარადგინა.

ზაზა ხატიაშვილის შეფასებით, ძალიან მნიშვნელოვანია უზენაესი სასამართლოს თავმჯდომარის თანამდებობაზე ისეთი ადამიანის მისვლა, ვინც მოსამართლის უფლებებს დაიცავს.

„ეს ჩემი ინიციატივა იყო. დათო მეწინააღმდეგებოდა, მე კი ვარწმუნებდი, რომ ადვოკატთა ასოციაციას უნდა ჰყოლოდა კანდიდატი, რომელიც ამ თანამდებობაზე ყოველმხრივ მისაღები იქნებოდა. ჩემი აზრით, ასეთი სწორედ დავით ასათიანია - პირველ რიგში, იმიტომ, რომ ძალიან პრინციპული, უაღრესად განათლებული, კომუნიკაბელური და თავისი საქმის ნამდვილი პროფესიონალია, კარგად იცის, რა ხდება სასამართლო სისტემაში. ამასთანავე, მისი წარსული ცხოვრებიდან გამომდინარე, ის ნამდვილად მისაღები იქნება სასამართლო კორპუსისთვის“, - აცხადებს ხატიაშვილი „ვერსიასთან“ საუბრისას.

მისივე თქმით, უზენაესი სასამართლოს თავმჯდომარე ძალიან მნიშვნელოვანი ფიგურაა და მის ხელშია მოსამართლოს სისხლის სამართლის პასუხისგებაში მიცემაზე თანხმობის საკითხი.

„იგი ძალიან კარგი მენეჯერია და შეუძლია, სასამართლო მოწოდების სიმაღლეზე დააყენოს. კარგად იცის, თუ რა სტკივა სასამართლო სისტემას. თუმცა, დათო არასდროს ლაპარაკობს თავის უნარებსა და მიღწევებზე, უბრალოდ, აკეთებს თავის საქმეს. მინდა, გავიხსენო ერთი ფაქტი: სააკაშვილის რეჟიმის დროს, 2010 წლის სექტემბერში, მე და დავით ასათიანი ციურიხში ევროპის ადვოკატთა ასოციაციის პლენარულ სესიაზე წავედით. დავაყენეთ წინადადება, რომ საქართველოში ადვოკატები ზეწოლას განიცდიდნენ. შემდეგ, როდესაც თბილისში ევროპის ადვოკატთა საერთაშორისო დელეგაცია ჩამოვიდა, დაიდო სკანდალური დასკვნა, რომ ადვოკატთა კორპუსი იდევნებოდა. დათო იყო ის ადამიანი, რომელმაც, ფაქტობრივად, ადვოკატთა ასოციაციის თავჯდომარესთან ერთად, დააორგანიზა ეს ღონისძიება და უმასპინძლა ამ ხალხს, მაშინ როცა თვითონ არასდროს ჩანდა. ყოველთვის ისე აკეთებდა საქმეს რომ არ ახდენდა ამის აფიშირებას. მე ვიცი, რამდენს აკეთებს ეს ადამიანი და ამიტომ ვუთხარი - კარგი იქნება, თუ საზოგადოებაც გაიგებს და დაინახავს, რისი გაკეთება შეგიძლია-მეთქი. ევროპის ადვოკატთა ასოციაციის პრეზიდენტმა მარსელა ბრასელმა დავით ასათიანი ევროპის ადვოკატთა ასოციაციაში საქართველოს წარმომადგენლად დანიშნა. ევროპის ადვოკატთა ასოციაციამ თავის პირად წარმომადგენლად სწორედ დავით ასათიანი გამოარჩია. მან იცის, როგორ უნდა დაიცვას ადვოკატის უფლებები. ძალიან მნიშვნელოვანია უზენაესი სასამართლოს თავმჯდომარის თანამდებობაზე ისეთი ადამიანის მისვლა, ვინც მოსამართლის უფლებებს დაიცავს. თუ მოსამართლეს შიში ექნება, რომ კანონიერი გადაწყვეტილების გამო დასჯიან, სასამართლო სისტემა ვერ განვითარდება. დათო იქნება გარანტი იმისა, რომ ასეთი ფაქტები არ მოხდება“, - აცხადებს ხატიაშვილი.

მისივე თქმით, დავით ასათიანი არასოდეს არცერთი პარტიის წევრი არ ყოფილა და არცერთი პოლიტიკური ძალის სასარგებლოდ განცხადება არასოდეს გაუკეთებია