სოციალიზმი ბრუნდება! – თავდაცვის უწყების სურსათით მომარაგებისთვის სახელმწიფო კომპანია შეიქმნა

ბიზნესი & ეკონომიკა - 23:15, 12 Feb, 2015

3344

სოციალიზმი ბრუნდება! - ასე ეხმაურება ეკონომისტი რომან გოცირიძე თავდაცვის უწყებაში საკვებით მომარაგებისთვის სახელწმიფო კომპანიის შექმნას.

ეკონომიკის სამინისტროს განმარტებით, "ქართული კვების კომპანიაში" რებრენდინგი იგეგმება. აქვე საუბარია იმაზე, რომ 14 თებერვალს კომპანიას და თავდაცვის სამინისტროს შორის დადებულ ხელშეკრულებას ვადა ეწურება.

როგორც ცნობილი გახდა, ქართული ჯარის კვებას ახალი ბიზნესსუბიექტი - „სახელმწიფო კვებითი უზრუნველყოფა“ განახორციელებს. „ქართული კვების კომპანიის“ ხელმძღვანელის მირანდა მანჯგალაძის თქმით, ეს იქნება ახალი კომპანია, რომლის 100 პროცენტიანი წილის მფლობელი სახელმწიფო იქნება.

,,თავდაცვის სამინისტროს სურსათით მოსამარაგებლად სახელმწიფო კომპანია შეიქმნა. მალე სამხედრო ფორმის შემკერავი კომპანიაც გაჩნდება, მერე გზების დაგებასაც სახელმწიფო დაიწყებს, ხვნა-თესვას უკვე ისედაც სახელმწიფო ტრაქტორები ეწევიან, რომლებიც ორი თვე მუშაობენ და ათი თვე გზისპირად დგანან საჩვენებლად უსაქმოდ ( ეს უკანასკნელი, წინა ხელისუფლებიდან გადმოყოლილი სასიამოვნო საჩუქარია ამ ხელისუფლებისდმი). რამდენი "რაციონალური" იდეა მოუვათ თავში, რომ კერძოს ნაცვლად სახელმწიფომ აკეთოს.

"მერე არ იკითხოთ, რა ემართება ლარსო!"

ეს მისამღერი ექნება ჩემს პოსტში ყველა იმ თემას, რომელიც სახელმწიფოს მიერ კერძო, ჯანსაღი საბაზრო მექნიზმების ჩანაცვლებას შეეხება....სანამ ლარი მართლა არ დასტაბილურდება!“ - წერს რომან გოცირიძე.