ინვესტორისთვის მიწის მიყიდვაა წამგებიანი და უქნარა ოლიგარქისთვის გადაცემა მომგებიანი?

ინვესტორისთვის მიწის მიყიდვაა წამგებიანი და უქნარა ოლიგარქისთვის გადაცემა მომგებიანი? - ბურჭულაძე

ბიზნესი & ეკონომიკა - 20:50, 11 Feb, 2015

1978

ყველაზე საშიში ისაა, რომ მთავრობა ნებისმიერ ინვესტორს კონკურენტად განიხილავს - ასე აფასებს ,,ნიუპოსტთან“ კომენტარში ,,ნაციონალური მოძრაობის“ წევრი მუხრან ბურჭულაძე სასოფლო-სამეურნეო დანიშნულების მიწის ნაკვეთების გადაცემასთან დაკავშირებით იუსტიციის სამინისტრის ახალ რეგულაციებს.

,,უცხო ქვეყნის მოქალაქეებს მანამდეც შეეძლოთ საკუთრებაში მემკვიდრეობით მიეღოთ სასოფლო-სამეურნეო დანიშნულების მიწის ნაკვეთები, სანამ ოცნება მათ ახალ რეგულაციებს და შეზღუდვებს დაუწესებდა და მინდა მოსახლეობას ავუხსნა, რომ ამაში სიახლე არაფერია - უბრალოდ უნიჭო მთავრობამ დაინახა რა შედეგი გამოიღო ინვესტორების ქონების გაყინვამ და ქვეყნიდან მათმა განდევნამ.

სამწუხაროდ უვიცობის ზეიმია ქვეყანაში - ინვესტორი იმიტომაა ინვესტორი, რომ ის საკუთარი ბიზნეს ინტერესიდან გამომდინარე შემოდის ბაზარზე, სხვა შემთხვევაში მოწყალებას გაიღებდა და ფულს გვაჩუქრბდა. სწორედაც რომ საკუთარი მიზნებიდან გამომდინარე ყიდულობენ მიწებს და რაც მთავარია, მოგების მიზნით და არა იმისათვის, რომ პიკასოს სურათივით მკვდარ კაპიტალად აქციონ“ - აცხადებს ბურჭულაძე.

რაც შეეხება უმიზნოდ მიწის ნაკვეთის ყიდვის აკრძალვას, ბურჭულაძე ამბობს, რომ პრობლემა ინვესტორებთან ხელისუფლების დამოკიდებულებაა, მისი თქმით, მთავრობას ფულის შემოდინების შიში აქვს და ინვესტორს კონკურენტად განიხილავს.

,,რას ნიშნავს უმიზნოდ არავის დართავენ მიწის ყიდვის უფლებას, ინვესტორისთვის მიწის მიყიდვა ქვეყნისთვის წამგებიანია და უქნარა ოლიგარქისთვის ათასობით ჰექტრის გადაცემა მომგებიანი?

გადაამოწმეთ ივანიშვილის საკუთრებაში არსებული მიწის ნაკვეთების ფართობი და დაადგენთ უმიზნოდ გაყიდული ქონების ფასს.

ყველაზე საშიში ისაა რომ მთავრობას დიდი ფულის შემოდინების შიში აქვს და ეს მხოლოდ იმაზე მეტყველებს, რომ ნებისმიერ ინვესტორს ისინი კონკურენტად განიხილავენ - აი ესაა რამაც ჩამოშალა ქვეყნის ეკონომიკა და გააუფასურა ეროვნული ვალუტა“ - აცხადებს ბურჭულაძე.