„მე საქართველოში პაატა ბურჭულაძის გამო ჩამოვედი. პაატა ნამდვილი ვარსკვლავია და ეს ქართველებმა ჩემზე უკეთ იცით“, - აღნიშნა თბილისში მყოფმა ალენ დელონმა.

ფრანგი მსახიობი საქართველოში, დღეს, გამთენიისას საკუთარი თვითმფრინავით ჩამოფრინდა. მსახიობი პაატა ბურჭულაძის საიუბილეო კონცერტს წარუძღვება.

ალენ დელონის პრესკონფერენცია დღეს შედგება.

პაატა ბურჭულაძე 60 წლის იუბილისადმი მიძღვნილ კონცერტში 15-მდე ქართველი და უცხოელი მსოფლიო ვარსკვლავი მიიღებს მონაწილეობას.

მონაწილეობენ: ნინო მაჩაიძე, მაყვალა ქასრაშვილი, იანო თამარი (ალიბეგაშვილი), ანიტა რაჭველიშვილი, თამარ ივერი, ნინო სურგულაძე, მარიკა გულორდავა, თეონა დვალი, ნანა მირიანი (ქავთარაშვილი), ოლგა ბოროდინა, ირინა მაკაროვა

საგანგებოდ იუბილესათვის სპორტის სასახლეში შენდება ვიოლინოს გასაღების ფორმის უპრეცედენტო მასშტაბის (600კვ.მ) სცენა და ორიგინალური დეკორაცია ეკრანებით, სპეციფიკური განათებითა და გახმოვანებით.

სპეციალურად ამ დღისათვის ერთიანდება ორი სიმფონიური ორკესტრი - ზ.ფალიაშვილის სახელობის ოპერისა და ბალეტის სახელმწიფო აკადემიური თეატრის ორკესტრი და ე.მიქელაძის სახელობის სახელმწიფო სიმფონიური ორკესტრი. გაერთიანებულ ორკესტრს ორი მაესტრო უდირიჟორებს - ჯანლუკა მარჩანო და ნიკოლოზ რაჭველი.

კონცერტში მონაწილეობას მიიღებს მსოფლიოში აღიარებული ქართველი მევიოლინე - ლიანა ისაკაძე.