„პირდაპირ ეთერში საშინლად სცემეს გია ჯაჯანიძე“ - ფოტო ამ სათაურით „ინტერნეტვირუსად“ იქცა და უკვე მეორე დღეა ინტერნეტსივრცეც „დაიპყრო“.

რა არის ეს? - კითხულობს გია ჯაჯანიძე და „ნიუპოსტის“ მეშვეობით კეთილისმსურველებს ამცნობს რომ არავის გაულახავს და ჯანმრთელადაა. თუმცა, იმდენი ვინმე შეაწუხა ამ „ნიუსმა“, რომ ცოტათი თავადაც აღშფოთებულია.

გია ჯაჯანიძე: „გულგახეთქილმა დამირეკა დედაჩემმა, რა მოხდა შვილო, რატომ გცემესო. არაფერი მომხდარა-მეთქი. ჩაწერაზე ვიყავი და ჩუმად ველაპარაკებოდი. რატომ ლაპარაკობ აბა ჩუმადო, არ დაიჯერა რომ ჩაწერაზე ვიყავი, ლამის გადაირია. დავამშვიდე, გავთიშე ტელეფონი და მირეკავს ჩემი და, ერთი სიტყვით ატყდა ამბავი, ბოლოს კი გადაცემის ჩაწერაც გააჩერეს ამის გამო...

-როგორ ფიქრობ ვის დასჭირდა ეს ყოველივე და რეალურად რა ხდება ფოტოზე, რომელიც გამოქვეყნდა?

კადრი არის აღებული GDS-ის გადაცემიდან, „ბინა + 18“, ამ შოუში მივიღე მონაწილეობა და ძირს ვზივარ, მაქვს დაჯღანული სახე და ერთ-ერთმა წამყვანმა უნდა ამიყვანოს ხელში, ვიცინი, ოღონდ კადრი არის ისე მოჭრილი და სახე ისე ჩანს თითქოს შეწუხებული, გეგონება რომ რაღაც დოკუმენტურად გადაიღეს თუ როგორ მირტყამენ.

წუხელ არ გაჩერებულა ტელეფონი, უამრავი მწერდა „ფეისბუქზე“ - ვინ დაგხვდა, ვინ გცემაო.

არ ვიცი ვინ აკეთებს ამას ან რატომ?! არც ის ვიცი ეს მტერი ვინ მყავს, ისე მაინც დამანახა. არადა მე მტრებს მუდმივად ვლოცავ და ვიმეორებ - ჩემი მტერი იყოს ჯანმრთელად-მეთქი... და რატომ ვლოცავ იცით? ერთმა მღვდელმა მასწავლა, თურმე მტერს რომ ლოცავ ტვინიც უჯანმრთელდება და აზროვნებაც ბევრად ჯანსაღი უხდება. ჰოდა, უკვე მტერი აღარ არის.

მე ვლოცავ მტერს და ჯანმრთელ ტვინთან ერთად ვუსურვებ, რომ ჰქონდეს ბევრი ფული და იყოს წარმატებული, ბევრი ფული როცა ექნება და წარმატებული იქნება აღარ შეშურდება არავისი და იქნება თავისთვის.

ამიტომ ყველას ვუსურვებ ასე დალოცოს მტერი, იქნებ მართლა მოხდეს დიდი სასწაული. გამოჯანმრთელდეს ყველა და გადაეჩვიოს ხალხი ამ მტრობას.