"მე და საზოგადოება"- სკოლებში ახალი საგნის სწავლება იწყება

საზოგადოება - 12:40, 10 Feb, 2015

6491

ეროვნულ სასწავლო გეგმაში ცვლილებები შევიდა, რომლის თანახმადაც საქართველოს სკოლებში ახალი საგნის "მე და საზოგადოება"-ს სწავლება იწყება

2015-2016 სასწავლო წელი აღნიშნული საგნისთვის საპილოტე იქნება და საგნის სწავლება თბილისსა და რეგიონების რამდენიმე სკოლაში დაიწყება. შემდეგი 2016-2017 სასწავლო წლიდან კი საგნის სწავლება მთელი საქართველოს მასშტაბით, როგორც საჯარო, ისე კერძო სკოლებში სავალდებულო გახდება.

როგორც საქართველოს განათლების უწყების წარმომადგენლები აცხადებენ საგნის ძირითადი მიმართულებები პიროვნული განვითარება და იდენტობა იქნება.

ამჟამად სამოქალაქო განათლების სწავლება სავალდებულოა მე-9 მე-10 კლასებში, სხვა კლასებში კი სამოქალაქო განათლების თემები სხვადასახვა საგნებშია ინტეგრირებული.

როგორც განათლების სამინისტროში აღნიშნავენ, სამოქალაქო ცნობიერების ხარისხი მაინც დაბალია და საგნის მე-9 კლასიდან სწავლება დაგვიანებულია. ამიტომ საგნის "მე და საზოგადოება" სწავლება ამ ეტაპზე მესამე და მეოთხე კლასში დაიწყება

მათი თქმით, საგნის სწავლების პირველი და ყველაზე მნიშვნელოვანი თემა - საკუთარი პიროვნების შეგნებაა და შინაარსი ისეა დალაგებული, რომ მოსწავლეს თვითანალიზის უნარი განუვითაროს. განსზღვროს საკუთარი სოციალური როლი და იდენტობა ოჯახთან, საზოგადოებასთან მიმართებაში, სკოლაში, მიკროსოციუმში, სამეგობროში. გაიაზროს, როგორ შეიძლება განივითაროს საკუთარი ნიჭი. რატომ უნდა ჰქონდეს ღირსების გრძნობა, რა პასუხისმგებლობები აკისრია, როგორ უნდა მიხედოს საკუთარ თავს, რომ ის იყოს სრულფასოვანი წევრი

საგანმანათლებლო რესურსი სახელმძღვანელოს სახით "მე და საზოგადოებაში" ჯერ არ არსებობს. განათლების უწყების განცხადებით ახალი ეროვნული სასწავლო გეგმის დამტკიცების შემდეგ, შესაბამისი სახელმძღვანელოზე კონკურსი გამოცხადდება. მათი თქმით, ამ ეტაპზე სტანდარტი და შესაბამისი მასალები უკვე მომზადებულია..