ლეიკემიისა და სხვა ონკოჰემატოლოგიური დაავადებების მქონე პაციენტებში ძვლის ტვინის ტრანსპლანტაციის პროგრამის ფარგლებში, 9 თებერვალს თურქეთში პირველი პაციენტი გაემგზავრა.

26 წლის იულია კონდრატენკოს სტამბოლის "Liv Hospital"-ში ძვლის ტვინის ტრანსპლანტაცია ჩაუტარდება.

თბილისის მერიის ჯანდაცვისა და სოციალური მომსახურების საქალაქო სამსახურის პროგრამის ფარგლებში, ძვლის ტვინის ტრანსპლანტაცია და ტრანსპლანტაციის შემდგომი პერიოდი 200 ათასი ლარით დაფინანსდა. სახელმწიფოს მხრიდან ამ მიზნით ასეთი მოცულობით დახმარება უპრეცედენტოა.

თბილისის საერთაშორისო აეროპორტიდან პაციენტი თბილისის მერიის ჯანდაცვისა და სოციალური მომსახურების საქალაქო სამსახურის ფროსმა გელა ჩივიაშვილმა, ოჯახის წევრებმა და ახლობლებმა გააცილეს. გელა ჩივიაშვილის თქმით, დღეს სამკურნალოდ პირველი პაციენტი გამეგზავრა, რომლის მკურნალობის ხარჯებიც მთლიანად თბილისის მერიამ დააფინანსა. „თბილისის მერია მზად არის პროგრამის ფარგლებში ყველა პაციენტი დააფინანსოს და მაქსიმალურად გვერდში დაუდგეს ლეიკემიით დაავადებულ პაციენტებს“ -განაცხადა ჯანდაცვისა და სოციალური მომსახურების საქალაქო სამსახურის უფროსმა.

ლეიკემიისა და სხვა ონკოჰემატოლოგიური დაავადებების მქონე პაციენტებში ძვლის ტვინის ტრანსპლანტაციის პროგრამის 2015 წლის ბიუჯეტი 4 მილიონი ლარია და მის ფარგლებში თბილისში რეგისტრირებული 30 წლამდე ონკოჰემატოლოგიური დაავადებების მქონე 20 ბენეფიციარის ოპერაცია და პოსტოპერაციული პერიოდი დაფინანსდება.

პროგრამა მოიცავს შემდეგი დაავადებების მქონე პირთა ძვლის ტვინის ტრანსპლანტაციას: მწვავე ლეიკემია, ქრონიკული მიელოიდური ლეიკემია; იუვენური მიელომონოციტარული ლეიკემია; არა-ჰოჯკინის ლიმფომა; ჰოჯკინის ლიმფომა; მიელოდისპლაზიური სინდრომი; აპლასტიური ანემია; ჰისტიოციტოზი.