ესპანეთის ერთი-ერთი წამყვანი ბიზნეს კორპორაციის ACCIONA-ს დელეგაცია საპარტნიორო ფონდის მენეჯმენტს შეხვდა. შეხვედრაზე მხარეებმა ურთიერთთანამშრომლობის სურვილი გამოხატეს. მათ კომპანია ACCIONA-ს და ფონდის ისტორიაზე, სტრუქტურასა და საქმიანობის პრიორიტეტული სექტორებზე ისაუბრეს.

გამომდინარე იქიდან, რომ ACCIONA-ს ინტერესის ძირითადი სფეროები ინფრასტრუქტურული და ენერგეტიკული მშენებლობებია და მას გააჩნია სურვილი დაიწყოს საქმიანობა საქართველოში, სტუმრები ფონდის მიერ ამ სფეროებში მიმდინარე პროექტებით დაინტერესდნენ.

ACCIONA 1930 წელს დაფუძნებული ესპანური კორპორაციაა, რომელიც პროექტებს მსოფლიოს მასშტაბით ახორციელებს. 2013 წლის მონაცემით, კორპორაციას დასაქმებული ყავს 34,108 თანამშრომელი და მისი წლიური შემოსავალი 6,607 მილიონი ევროა.

საპარტნიორო ფონდის შესახებ

სააქციო საზოგადოება საპარტნიორო ფონდი საქართველოს მთავრობის მიერ 2011 წელს დაარსდა. სახელმწიფო ფლობს ფონდის 100 პროცენტს. საპარტნიორო ფონდის აქტივები 5 მილიარდ ლარს აჭარბებს. ფონდი ფლობს „საქართველოს რკინიგზის“, „საქართველოს ნავთობისა და გაზის კორპორაციის“, „საქართველოს სახელმწიფო ელექტროსისტემის“, ელექტროსისტემების კომერციული ოპერატორისა“ და ნაწილობრივ, „თელასის“ აქციებს. ფონდის ერთ-ერთი მთავარი ამოცანაა საინვესტიციო მიმართულებებთან ერთად, ამ სახელმწიფო სტრატეგიული აქციების სწორი კორპორატიული მართვა.