საპარტნიორო ფონდის ე.წ. სენდვიჩ პანელების პროექტი დასკვნით ფაზაში გადავიდა

ბიზნესი & ეკონომიკა - 17:11, 06 Feb, 2015

1182

საპარტნიორო ფონდის ე.წ. სენდვიჩ პანელების პროექტის განხორციელების პროცესი დასასრულს მიუახლოვდა. საწარმო რუსთავის გზატკეცილზე უკვე აშენდა და იგი ამჟამად აღჭურვის პროცესშია.

„ადგილზე უკვე ჩამოვიდა კორეული დანადგარები, ხოლო იტალიური დანადგარების ტრანსპორტირება უახლოეს პერიოდში განხორციელდება,“ განაცხადა საპარტნიორო ფონდის აღმასრულებელმა დირექტორმა ირაკლი კოვზანაძემ. კოვზანაძის თანახმად, კორეულ დანადგარები 104 ტონას იწონის და ტრანსპორტირება ფოთიდან ათი კონტეინერის საშუალებით მოხერხდა.

ე.წ. „სენდვიჩ პანელები“ ლითონის ფურცლებია, რომლებიც პოლიურეთანის ქაფითაა შევსებული და ინდუსტრიული დანიშნულების შენობების მშენებლობისას გამოიყენება.

საპარტნიორო ფონდი პროექტს ადგილობრივ კომპანია შპს ICES-ის ერთბლივად ახორციელებს. მათ ამ მიზნით საწარმო „პანექსი“ დააფუძნეს, რომლის საწარმოო ხაზის დაგეგმილი სიმძლავრე წელიწადში 2.8 მლნ მ2 პანელი იქნება. საწარმოს ინვესტიციის მთლიანი მოცულობა $ 6 მლნ აშშ დოლარია. საპარტნიორო ფონდი შპს „პანექსში“ კაპიტალის 49%-ს ფლობს. პირველი პროდუქცია ბაზარზე მიმდინარე წლის გაზაფხულიდან გაიყიდება.