ტელეკომპანია „რუსთავი 2“-ის გენერალური დირექტორი ნიკა გვარამია მიიჩნევს, რომ „მაუწყებლის შესახებ კანონში“ დაგეგმილი ცვლილებების პროექტის განხილვა უნდა გადაიდოს.

გვარამია აღნიშნულ საკითხზე პარლამენტის თავმჯდომარესთა, პრეზიდენტთან და პრემიერ-მინისტრთან შეხვედრას ითხოვს.

„ამ ცვლილების ჩვენ ვიღებთ მდგომარეობას, როდესაც რეკლამის ფასები უნდა გაიზარდოს 50 პროცენტით, მაშინ როდესაც ქვეყანაში ეკონომიკური ზრდა მხოლოდ 5%-ია, აუცილებლად უნდა გადაიხედოს საკითხი ხელფასების შემცირებაზე, მაშინ როცა ლარის კურსი დოლართან მიმართებაში ერთი ორთან არის და ბუნებრივია, უნდა შემცირდეს ბიუჯეტი დაახლოებით 10%-ით, რაც თანამშრომლობის შემცირებას გამოიწვევს. მინიმუმ 100 თანამშრომელი ჩვენ გასათავისუფლებელი გვეყოლება. ეს არის ნაბიჯი უმუშევრობისკენ გადადგმული, რაც არ მესმის, როგორ შეიძლება მთავრობას აწყობდეს. ამიტომ ჩვენ ვითხოვთ, რომ ამ კანონპროექტის განხილვა იქნეს გადადებული და გავესაუბროთ პრემიერ-მინისტრს, პარლამენტის თავმჯდომარეს და პრეზიდენტს“, - განაცხადა გვარამიამ.

პარლამენტმა მაუწყებლის შესახებ კანონში შესატანი ცვლილებები მეორე მოსმენით მიიღო.