საქართველოში მას ერთ-ერთ საუკეთესო მომღერლად აღიარებენ, თუმცა მიუხედავად ამგვარი შეფასებისა ქართული სცენა წლების განმავლობაში მისთვის „ჩარაზული“ იყო... კონცერტებით გათამამებული არც ახლა გახლავთ...

წლების წინ გაუსაძლისმა სოციალურმა პირობებმა საქართველოს დატოვება და რამდენიმე ხნით მოსკოვში „გახიზვნა“ აიძულა, მაგრამ იქედანაც მალევე დაბრუნდა. უფრო ადრე კი, როგორც თავად ამბობს იყო შემოთავაზება ამერიკიდან, მერე საფრანგეთიდან... მოლაპარაკება მომღერლის უარით სრულდებოდა.

დღეს ამ ყველაფერს „ნანუკას შოუში“ სინანულით იხსენებს და აცხადებს, რომ ახლა უკვე სიამოვნებით დატოვებდა საქართველოს.

ეკა კვალიაშვილი: „მაშინ უბრალოდ გადამარჩინა ამ წასვლამ, რადგან შეუძლებელი გახდა არსებობა აქ ჩემთვის და ჩემი ოჯახისთვის... იმ პერიოდში აქ ვერ ვმუშაობდი. ძალიანაც მინდოდა, მაგრამ ვერ ვმუშაობდი...

ამის მიზეზი მხოლოდ პოლიტიკური განწყობა არ ყოფილა. თუმცა საჭე, ვისაც ეჭირა ხელში და შეეძლო ამ სიტუაციის მართვა, მხოლოდ მათთან დაახლოებული მომღერლები გრძნობდნენ თავს ძალიან კარგად. ჩემს შემთხვევაში კონკრეტული ადამიანები იყვნენ ხელისშემშლელნი... თქვენ ვერც კი წარმოიდგენთ როგორი 10 წელი გამოვიარე...

დიდი შეცდომა იყო მოსკოვიდან ჩამოსვლა, მარტო მოსკოვიდან ჩამოსვლა კი არა ყველა იმ შემოთავაზებაზე უარის თქმა რაც უცხოეთიდან მივიღე. ძალიან ბევრგან მქონდა ასეთი სიტუაციები. სადაც ჩავიდოდი მთხოვდნენ - დარჩითო. გამუდმებით უარზე ვიყავი.

უაზრო პატრიოტიზმი მჭირდა ახლა აღარ მჭირს . ახლა წასვლა მინდა ისე ძალიან რომ უკან არ მოვიხედავ. აღარ მინდა აქ ყოფნა... დავიღალე...