კახეთის გზატკეცილზე ე.წ. ვარკეთილის ხიდი გამოიცდება

საზოგადოება - 21:39, 04 Feb, 2015

1992

დღეს ღამის 12 საათიდან კახეთის გზატკეცილზე გზაგამტარი, ე.წ. ვარკეთილის ხიდი გამოიცდება. აღნიშნულ ტერიტორიაზე ჩაიკეტება გზის ძირითადი მოძრაობის ზოლი და ავტომობილებისთვის გადაადგილება მეორეხარისხოვანი ზოლებით იქნება შესაძლებელი.

ხიდის გამოცდა მთელი ღამის განმავლობაში გაგრძელდება. თავდაპირველად ნაგებობაზე განთავსდება სატვირთო მანქანები, რომელბიც შემდეგ სხვადასხვა მიმართულებით იმოძრავებენ. პარალელურად, სპეციალისტები ხიდზე მიმდინარე პროცესებს სპეციალური ხელსაწყოებით შეამოწმებენ. გზაგამტარის გამოცდის საბოლოო დასკვნა რამდენიმე კვირაში გახდება ცნობილი.

კახეთის გზატკეცილზე 15 თებერვლამდე კიდევ სამი გზაგამტარი გამოიცდება.

ხიდებისა და მეტეხის გვირაბის გამოკვლევა-გამოცდის პროექტის ფარგლებში, კვლევა უკვე ჩაუტარდა 8 ნაგებობას. კვლევის მიზანია ობიექტების მდგომარეობის დადგენა და, საჭიროების შემთხვევაში, განსახორციელებლი სარეაბილიტაციო სამუშაოებისა და მათი ღირებულების განსაზღვრა.

კვლევითი სამუშაოებს საქართველოს ტექნიკური უნივერსიტეტის ხიდსაცდელი ცენტრი აწარმოებს. პროექტი, რომლისთვისაც დედაქალაქის ბიუჯეტიდან 397 900 ლარია გამოყოფილი, 2015 წლის მაისში დასრულდება.