მიწისქვეშა გადასასვლელის დაბინძურების გამო მოქალაქე დაჯარიმდება

საზოგადოება - 12:10, 04 Feb, 2015

800

თბილისის მერმა დავით ნარმანიამ დედაქალაქის მთავრობის სხდომაზე მიწისქვეშა გადასასვლებში სისუფთავის დაცვის აუცილებლობაზე იაუბრა და განაცხადა, რომ გადასასვლელების დაბინძურება მოქალაქეების დასჯას გამოიწვევს. ნარმანიამ განმარტა, რომ მიწისქვეშა გადასასვლელებში აიკრძალება პლაკატების და საინფორმაციო ბუკლეტების გაკვრაც.

„მინდა გავაკეთო განმარტება მოქალაქეებისთვის. მხოლოდ მუნიციპალიტეტების აქტიურობით ეს პრობლემა ვერ გადაიჭრება. მინდა თითოეულ მოქალაქეს ვთხოვო, დაიცვან წესრიგი და არ დააბინძურონ მიწისქვეშა გადასასვლელები, წინააღმდეგ შემთხვევაში იძულებულნი ვიქნებით, ადმინისტრაციულ სამართალდარღვევათა კოდექსის შესაბამისად დავაჯარიმოთ ისინი,“-განაცხადა დავით ნარმანიამ.

ნარმანიას თქმით მიწისქვეშა გადასასვლელებში პრლაკატების და საინფორმაციო ბუკლეტების უკანონოდ განთავსების შემთხვევაში, მოქალაქე პირველ შემთხვევაში დაჯარიმდება 50 ლარით, ხოლო განმეორების შემთხვევაში ჯარიმა 500 ლარმადე გაიზრდება. უფრო მაღალია ჯარიმა კულტურული მემკვიდრეობის ობიექტებზე მსგავსი მასალების განთავსებაზე - პირველ შემთხვევაში ჯარიმა 1000 ლარია, ხოლო განმეორებით შემთხვევაში, 2000 ლარი.