ჩუღურეთის რაიონში უფასო სასადილოების მონიტორინგი განხორციელდა

საზოგადოება - 15:25, 03 Feb, 2015

1253

თბილისის მერიის ჯანდაცვისა და სოციალური მომსახურეობის სამსახურის უფროსმა გელა ჩივიაშვილმა და ჩუღურეთის რაიონის გამგებელმა ზურაბ ჩიკვილაძემ სოციალურად დაუცველთათვის მოწყობილი სასადილოების მონიტორინგი განახორციელეს და ბენეფიციარებს გაესაუბრნენ.

ჯანდაცვისა და სოციალური მომსახურეობის სამსახურის უფროსის გელა ჩივიაშვილის თქმით, ახალმა სატენდერო მოთხოვნებმა მნიშვნელოვნად გააუმჯობესა აქამდე არსებული მენიუ, ბენეფიციარები კმაყოფილები არიან და ხედავენ განსხვავებას ძველსა და ახალ სასადილოებს შორის. „ჩვენი მუდმივი საზრუნავი იქნება უმწეო მოქალაქეებისთვის უფრო ხარისხიანი პროდუქტების მიწოდება და აღნიშნული პროგრამის მეტად სრულყოფა, თუნდაც, საინტარული თვალსაზრისით“,– განაცხადა გელა ჩივიაშვილმა.

ჩუღურეთის რაიონის გამგებელმა ყურადღება ბენეფიციარების ინტერესებზე გაამახვილა და აღნიშნა, რომ მომსახურების სრულყოფის მიზნით, სასადილოები მუდმივად გაკონტროლდება. ზურაბ ჩიკვილაძის თქმით, წინა წლებთან შედარებით წელს სასადილოებში ბევრად უკეთესი მდგომარეობაა, თუმცა, პირობები კიდევ უფრო გაუმჯობესდება.

ჩუღურეთის რაიონში სულ 5 უფასო სასადილო ფუნქციონირებს, სადაც 2700 ბენეფიციარს შესაძლებლობა აქვს, მრავალფეროვანი და ხარისხიანი საკვები მიიღოს.

2015 წლის დასაწყისიდან უფასო სასადილოების ადგილმდებარეობა შეიცვალა და დღეს სოციალურად დაუცველებს თანამედროვე ტიპის კვების ობიექტებში ემსახურებიან. სოციალურად დაუცველებისთვის გარემო პირობების და მენიუს გაუმჯობესება ტენდერში გამარჯვებულმა კომპანიამ „ნილი“ უზრუნველყო.