თამარ სანიკიძის და 116-ე სკოლის სკანდალი გრძელდება

საზოგადოება - 14:16, 03 Feb, 2015

2719

პედაგოგთა საკოორდინაციო ცენტრი და 116-ე საჯარო სკოლის საგაფიცვო კომიტეტი 116-ე სკოლის ადმინისტრაციასა და განათლების სამინისტროს შორის არსებულ კონფლიქტზე განცხადებას ავრცელებს და განათლების უწყებას სკოლის დირექტორის და ისტორიის მასწავლებლის მიმართ განხორციელებული დევნის შეწყვეტისკენ მოუწოდებს:

"უკანასკნელი დღეების განმავლობაში საქართველოს განათლებისა და მეცნიერების სამინისტროს მხრიდან დაიწყო მორიგი მასშტაბური ზეწოლა 116-ე საჯარო სკოლის მოქმედი დირექტორის წინააღმდეგ, რაც ჩვენი აზრით არის გაგრძელება გასულ წლებში დაწყებული დევნისა. განათლებისა და მეცნიერების სამინისტრო ათასგვარი მოძველებული, უხეში და ბინძური მეთოდით ცდილობს შური იძიოს და გაუსწორდეს დიმიტრი მეჭურჭლიშვილს, იმის გამო რომ მან უარით უპასუხა მინისტრ სანიკიძის იძულებით დირექტივას - ჩამოაშოროს პედაგოგიურ საქმიანობას ამ სკოლის ისტორიის მასწავლებელი დავით ფერაძე. საბოლოო პირადი ანგარიშსწორება კი მიმართულია თავად ფერაძის წინააღმდეგ, რომელიც არ ეთანხმება სანიკიძის საგანმანათლებლო პოლიტიკას. ზეწოლის ისტორიაში ერთ-ერთი უპრეცედენტოა ე.წ. ანონიმური წერილი, რომელშიც წერია, რომ თურმე სსიპ ქალაქ თბილისის N116 საჯარო სკოლაში არის ფინანსური დარღვევეები, შერჩევით გაიცემა პრემიები, არის „გაბერილი“ შტატები და ა.შ. ცხადია, ანონიმური წერილი შეიცავს დეზინფორამაციას, მაგრამ ყველაზე ამაზრზენი გახლავთ ის, რომ წერილის ავტორი და თანდართული მისამართი თბილისში არ არსებობს. ჩვენი საფუძვლიანი ეჭვით ხსენებული შეთითხნილია თავად საქართველოს განათლებისა და მეცნიერების სამინისტროს შიდა აუდიტის დეპარტამენტში (მითითებული თარიღი 2014 წლის 17 აპრილი). ეჭვს აძლიერებს ის გარემოებაც, რომ შიდა აუდიტის დეპარტამენტის მიერ ინსპექტირების მცდელობა (საქმის გარემოებების მოკვლევა) დაიწყო თითქმის ერთწლიანი დაგვიანებით. ჩვენ ვასკვნით, რომ ხსენებული წერილს საფუძველზე და შიდა აუდიტის დეპარტამენტის მეშვეობით სანიკიძე ცდილობს მონიტორინგის ნიღბით განახორციელოს „შტურმი“ სკოლაზე. მიგვაჩნია, რომ 116-ე საჯარო სკოლაში არ არსებობს არანაირი სახის დარღვევა, რაც დირექტორთან დაკავშირებით შეკითხვებს გააჩენს, ასევე მიგვაჩნია, რომ მორალურად და სამართლებრივად სამინისტოროს შიდა აუდიტი და მისი ხელმძღვანელი თავად არიან ნეპოტიზმის წარმომადგენლები. ჩვენ არ ვცნობთ მათ. ამიტომ აუდიტის გამოჩენა სკოლის ეზოსთანაც კი მყისიერად გამოიწვევს 116-ე საჯარო სკოლის პედაგოგების, მოსწავლეებისა და მშობლების პროტესტს.
ჩვენ არაერთხელ შევთავაზეთ განათლებისა და მეცნიერების სამინისტროს შექმნილი კონფლიქტური სიტუაციიდან გამოსავალი, კერძოდ - წარადგინოს 116-ე საჯარო სკოლის დირექტორობის კანდიდატად დირექტორობის უფლების მქონე და უკანონოდ „დაბლოკილი“ დაიმიტრი მეჭურჭლიშვილი, რომელიც სასამართლოს გადაწყვეტილებით ამჟამად ისევ ასრულებს დირექტორის მოვალეობას. მინისტრის ეს გადაწყვეტილება შეარბილებდა, როგორც დაძაბულ სიტუაციას, ასევე ავტომატურად დაასრულებდა მეჭურჭლიშვილის მიერ განათლების სამინისტროს წინააღმდეგ დაწყებულ სასამართლო დავასაც. თუმცა, ჩვენ მოწინააღმდეგ მხარეს დაყენებული საკითხის გონივრულად გადაწყვეტისთვის ჯერ კიდევ აქვს დრო.
დღეიდან 116-ე საჯარო სკოლის საგაფიცვო კომიტეტი გადადის მუდმივ მზადყოფნაში საპროტესტო აქტივობებისთვის. ჩვენი კატეგორიული მოთხოვნაა: შეწყდეს სამინისტროს შიდა აუდიტის ინსპექტირების ეგიდით დაწყებული დევნა 116-ე საჯარო სკოლის მოქმედი დირექტორის დიმიტრი მეჭურჭლიშვილისა და ამავე სკოლის ისტორიის მასწავლებლის დავით ფერაძის მიმართ, წინააღმდეგ შემთხვევაში მოსალოდნელ დესტაბილიზაციასა და უმართავ პროცესებზე პასუხისმგებლობა დაეკისრება განათლებისა და მეცნიერების მინისტრს"- ნათქვამია განცხადებაში.