„ნიკორას“ პასუხი „გაფუჭებულ“ ხიზილალაზე

საზოგადოება - 11:50, 03 Feb, 2015

3394

სოციალურ ქსელში განთავსებულ განცხადებას ხიზილალის უვარგისობის შესახებ უამრავთა გამოხმაურება მოჰყვა. ინფორმაციის გადამოწმების მიზნით „ნიუპოსტი“ „ნიკორას“ დაუკავშირდა.

დაზარალებულის განცხადებით მას პროდუქტ-მენეჯერმა გაფუჭებული ხიზილალის გამო ბოდიში მოუხადა. „ნიკორა“ კი ამ ფაქტთან დაკავშირებით შემდეგს აცხადებს - „ფაქტის გადამოწმება/შესწავლამდე კომპანიის წარმომადგენელმა სიტუაცია არ გაამწვავა“...

პასუხი, რომელიც „ნიუპოსტმა“ "ნიკორას" წარმომადგენლობიდან მიიღო:

„ნიკორას“ შვილობილი კომპანია „ოკეანე“ ხიზილალას ოზურგეთის რაიონში მდებარე მეურნეობაში აწარმოებს. ხიზილალა კალმახისაა და შესაბამისად, მისი საგემოვნო თვისებები მცირედით განსხვავდება ორაგულისებრთა ხიზილალისგან.
აღნიშნული პროდუქტით მარაგდება „ნიკორას“ სუპერმარკეტების მთელი ქსელი, სადაც ყოველთვიურად, ნახევარ ტონამდე ხიზილალის რეალიზება ხდება. პროდუქტის ხარისხი სრულად შეესაბამება საერთაშორისო სტანდარტებს, რაზეც მასზე არსებული მზარდ მოთხოვნასთან ერთად, ის ფაქტიც ნათლად მეტყველებს, რომ წარმოების მრავალწლიანი ისტორიის მანძილზე, პროდუქტზე მომხმარებლის მხრიდან უარყოფითი დამოკიდებულება არ დაფიქსირებულა. ამას გარდა, ქსელში გაშვებამდე „ნიკორას“ წარმოებული სხვა პროდუქტების მსგავსად, ხიზილალას თითეული პარტიაც მკაცრ ლაბორატორიულ შემოწმებას გადის.

რაც შეეხება დიღმის მასივში მდებარე სუპერმარკეტში მომხდარ ინციდენტს, აღნიშნული პარტიის ხიზილალა სრულად გადამოწმდა, როგორც უშუალოდ სავაჭრო ობიექტში, ასევე კომპანიის მფლობელობაში არსებულ ლაბორატორიაში და დადგინდა, რომ იგი სრულ შესაბამისობაშია ნორმებთან.
Facebook-ის პოსტში მომხმარებელი იმასაც აღნიშნავს, რომ მას პროდუქტ-მენეჯერმა ბოდიში მოუხადა უხარისხო პროდუქტის გამო. „ნიკორას“ სუპერმარკეტების ქსელში მომხმარებელი ყოველთვის მართალია და შესაბამისად, ფაქტის გადამოწმება/შესწავლამდე კომპანიის წარმომადგენელმა სიტუაცია არ გაამწვავა და მომხდარი შემთხვევის გამო უკმაყოფილო მომხმარებელს ბოდიში მოუხადა. თუმცა, კიდევ ერთხელ აღვნიშნავთ, რომ პროდუქტის გადამოწმების შემდეგ დადგინდა, რომ აღნიშნული პარტიის ხიზილალა სრულად აკმაყოფილებს ხარისხის სტანდარტებს.