მშობლები 6 წლამდე ბავშვების სკოლაში მიღებას ითხოვენ

საზოგადოება - 15:39, 02 Feb, 2015

1810

სკოლაში სწავლის დაწყების ასაკთან დაკავშირებით დღეს შეხვედრა გაიმართა განათლების სამინისტროს საგანმანათლებლო დაწესებულების მანდატურის სამსახურთან არსებულ ფსიქოლოგიურ ცენტრში. შეხვედრას მშობლები, ფსიქოლოგები და პედაგოგები დაესწრენ. მშობლების ნაწილი სკოლაში იმ ბავშვების მიღებას ითხოვს, რომლებსაც 6 წელი იანვრამდე უსრულდებათ.

ფსიქოლოგებმა განმარტეს, რომ 5 და 6 წლის ასაკს განსხვავებული განვითარების საფეხურები გააჩნია და ამ ასაკში თითოეულ თვეს დიდი მნიშვნელობა აქვს ბავშვის განვითარებისთვის. ფსიქოლოგები გამოთქვამენ აზრს, რომ სკოლაში ბავშვის მისვლის მინიმალური ზღვარი 6 წელია, ხოლო ოპტიმალურ ასაკად 6 წელს და 8 თვეს ასახელებენ.

მშობლები დაინტერესდნენ თუ რას ასწავლიან ბაღში დარჩენილ ბავშვებს მთელი წლის განმავლობაში, რაზეც უპასუხეს, რომ განათლების სამინისტრო ამზადებს პროგრამას, რომელსაც ბაღებს შესთავაზებენ.

შეხვედრას ესწრებოდა ფსიქოლოგი რამაზ საყვარელიძე, რომელმაც განაცხადა, რომ სასურველია სასკოლო ასაკი 8 წლით განისაზღვროს.

„ბავშვს შეუძლია ყველაფერი აითვისოს, მაგრამ საკითხავია რის ხარჯზე. როცა ბავშვი ითვისებს თამაშის ხარჯზე, ბავშვური თავისუფლების დაკარგვა თავს იჩენს მოგვიანებით, ძალიან ხშირია ისეთი დარღვევები, რის გამოც ადამიანი ექიმთან მიდის“,-განაცხადა რამაზ საყვარელიძემ.

შეგახსენებთ, რომ მომავალი წლიდან სკოლაში მხოლოდ ის ბავშვები დაიშვებიან, რომლებსაც 6 წელი სწავლის დაწყებამდე უსრულდებათ. განათლების სამინისტრომ დააფიქსირა მკაცრი პოზიცია, რომ გამონაკლისების დაშვება არ მოხდება.